Пихар “Коко сири 2” мултфилми 2029-йилда чиқишини маълум қилди
Пихар студияси 2029-йилда "Коко сири 2" мултфилмининг премьераси бўлишини эълон қилди.
Д23 кўргазмасида Дисней ушбу филмнинг янги консепт-артларини намойиш этди. Унда вояга етган Мигел ўзининг содиқ дўсти Данте ити билан бирга тасвирланган. Компания, шунингдек, Пихар сиквели 2029-йилнинг ноябр ойида экранларга чиқишини ва Бенжамин Бретт Эрнесто де ла Круз ролини ижро этиш учун қайтишини тасдиқлади.
Асл "Коко сири" мултфилмининг режиссёри Ли Ункрич Адриан Молина билан биргаликда ушбу лойиҳа устида ишлашга қайтмоқда. "Ўйинчоқлар тарихи 4" ва "Бошқотирма 2" филмлари билан танилган Марк Нилсен эса продюсерлик вазифасини бажаради.
Биринчи "Коко сири" мултфилми 2017-йилда кинотеатрларда намойиш этилган ва танқидчилар ҳамда томошабинлар томонидан катта муваффақиятга эришган. У дунё бўйлаб 800 миллион доллардан ортиқ даромад келтириб, иккита "Оскар" мукофотини қўлга киритган: "Энг яхши анимацион филм" ва "Ремембер Ме" қўшиғи учун "Энг яхши оригинал қўшиқ".
"Коко сири 2" – Пихар студиясининг навбатдаги сиквели бўлиб, ижодкорлар студиянинг сўнгги ўн йилликлардаги энг катта ютуқларидан фойдаланишга умид қилмоқда. Студиянинг сўнгги релизлари орасида дунё бўйлаб 1 миллиард доллардан ортиқ даромад келтирган "Ўйинчоқлар тарихи 5" ва "Бошқотирма 2" каби филмлар бор. Студиянинг кейинги сиквели – "Супероила 3" бўлиб, унинг премьераси 2028-йилга режалаштирилган.