Pegasus Airlines Истанбулдан Бухоро, Андижон ва Термизга парвозларни йўлга қўяди
Туркиянинг «Pegasus Airlines» арзон авиакомпанияси 2026 йилнинг декабрь ойида Истанбулдан Бухоро ва Андижонга ҳамда 2027 йилнинг март ойида Термизга тўғридан-тўғри рейсларни йўлга қўйишни режалаштирмоқда. Чпталар нархи 99 доллардан бошланади ва бу йўловчиларнинг Тошкент орқали саёҳат қилишларига ҳожат қолдирмасдан, Ўзбекистоннинг учта шаҳри учун халқаро авиақатнов имкониятларини кенгайтиради.
Pegasus Airlines Истанбулдан Бухоро, Андижон ва Термизга парвозларни йўлга қўяди
Туркиянинг Pegasus Airlines арзон авиакомпанияси (лоукостери) 2026 йил декабрь ойида Истанбулдан Бухоро ва Андижонга, 2027 йил мартида эса Термизга мунтазам парвозларни бошлашни режалаштирмоқда, бу эса Туркия ва Ўзбекистон ўртасидаги тўғридан-тўғри авиаалоқани янада мустаҳкамлайди.
Авиакомпаниянинг расмий веб-сайти ва мобил иловасида кўрсатилишича, биринчи Истанбул–Бухоро рейси 14 декабрга, Истанбул–Андижон йўналиши эса 18 декабрга мўлжалланган. Термизга парвозлар 2027 йил 1 мартдан бошланиши керак. Учтала йўналиш бўйича ҳам чипталар аллақачон сотувга чиқарилган.
Нархлар 99 доллардан бошланади, бироқ якуний тариф саёҳат санаси, йўналиш ва бўш жойлар мавжудлигига қараб фарқ қилади. Авиакомпаниянинг асосий Light тарифига кўра, топшириладиган багаж ва стандарт қўл багажи учун алоҳида ҳақ олинади. Ушбу тариф бўйича йўловчилар самолёт салонига фақат 3 кг гача бўлган кичик сумкани бепул олишлари мумкин.
Йўналишлар Истанбулнинг Сабиҳа Гўкчен халқаро аэропорти орқали амалга оширилиши кутилмоқда, бу эса Бухоро, Андижон ва Термиздан келувчи саёҳатчиларга аввал Тошкентга бормасдан, Европа бўйлаб йўналишларга, жумладан Лондон, Манчестер, Париж ва Прагага уланиш имконини беради.
Фуқаро авиацияси агентлиги реестри шуни кўрсатадики, Pegasus Airlines компаниясига 6 октябрь куни Ўзбекистонда йўловчи ташиш учун 58-К-сонли фойдаланиш рухсатномаси берилган.
Pegasus Airlines компаниясининг Ўзбекистон бозорига кириб келиши мамлакат билан авиаалоқаларни очишга бўлган бир неча йиллик қизиқишлардан сўнг юз бермоқда. 2018 йилда Ўзбекистон туризм органи Туркия лоукостери билан мамлакатда фаолият бошлаш имкониятлари бўйича музокаралар олиб борилаётганини маълум қилган эди.
2021 йилда авиакомпания яна бир бор Ўзбекистонга, жумладан зиёрат туризмини қўллаб-қувватлашга қаратилган йўналишлар бўйича парвозларни йўлга қўйишга қизиқиш билдирган эди.
Pegasus Airlines Туркиянинг етакчи арзон авиакомпанияларидан бири бўлиб, унинг парвозлар географияси Европа, Яқин Шарқ ва Марказий Осиёни қамраб олади.