Туркиянинг Пегасус лоукостери Ўзбекистоннинг учта шаҳрига уча бошлайди

Туркиянинг Пегасус лоукостери Ўзбекистоннинг учта шаҳрига парвозларни бошлайди

Туркиянинг Пегасус Аирлинес арзон авиаташувчиси Истанбул билан Ўзбекистоннинг уч шаҳри — Бухоро, Андижон ва Термиз ўртасида мунтазам йўловчи қатновларини йўлга қўйишни режалаштирмоқда.

Компания учта янги йўналиш очилишини маълум қилган.

Янги йўналишлар ҳақидаги маълумотлар авиакомпания сайтида ҳам эълон қилинган бўлиб, унда Истанбулдан Бухоро, Андижон ва Термизга чипталар савдоси 99 доллардан (солиқларни ҳисобга олган ҳолда 89,99 евродан) бошланган. Якуний нархлар йўналиш, парвоз санаси ва бўш ўринлар сонига қараб ўзгаради.

Парвозлар Пегасус Аирлинесънинг асосий транзит марказларидан бири бўлган Истанбулдаги Сабиҳа Гўкчен аеропорти орқали амалга оширилиши кутилмоқда.

Янги йўналишларнинг ишга туширилиши Ўзбекистон вилоятларидаги йўловчиларга Тошкентга бормасдан туриб, Пегасус орқали Европа шаҳарларига, жумладан, Лондон, Манчестер, Париж ва Прагага транзит рейслардан фойдаланиш имконини беради.

Шу билан бирга, лоукостернинг тариф сиёсати хусусиятларини ҳам ҳисобга олиш керак. Энг арзон халқаро Лигҳт тарифида бепул рўйхатдан ўтказиладиган багаж ҳам, стандарт қўл юки ҳам назарда тутилмаган. Йўловчи фақат ўриндиқ остига жойлаштириладиган, оғирлиги 3 кг гача ва ўлчами 40×30×15 см дан ошмайдиган кичик сумкани бепул олиб чиқиши мумкин.

Қўшимча багаж учун алоҳида тўлов олинади.

Пегасусънинг Ўзбекистон бозорига кириши авиация маъмурияти ҳужжатлари билан ҳам тасдиқланган.

Фуқаро авиацияси агентлигининг расмий реестрига кўра, 2026-йил 6-октабрда Туркия авиакомпанияси йўловчи ташувларини амалга ошириш учун 58-К-сонли эксплуатация рухсатномасини олган.

Пегасус Аирлинесънинг Ўзбекистон бозорига чиқиши масаласи бир неча йилдан бери муҳокама қилинмоқда.

2019-йил май ойида Туризмни ривожлантириш давлат қўмитаси вакиллари Ўзбекистонга парвозларни бошлаш бўйича турк лоукостери ва Грециянинг Оранге2Флй компанияси билан музокаралар олиб борилаётганини маълум қилган эди.

2021-йил январида Пегасус Ўзбекистонга йўналишлар очишдан, хусусан, зиёрат туризмини ривожлантиришдан яна манфаатдор эканини билдирган. Ўшанда компания вакиллари Ўзбекистон делегацияси билан Сабиҳа Гўкчен аеропортининг имкониятларини муҳокама қилганди.

Пегасус Аирлинес — Туркиянинг энг йирик арзон авиаташувчиларидан бири. Компания ички ва халқаро рейсларни, жумладан, Европа, Яқин Шарқ ва Марказий Осиё давлатларига парвозларни амалга оширади.