Паспорт ёки ИД-карта йўқолганда нима қилиш керак?
Паспорт ёки ИД-карта йўқолган тақдирда бу ҳақда хабар бериш ва янги ҳужжат расмийлаштириш керак. Паспорт ёки ИД-карта йўқолганда қаерга мурожаат қилиш, расмийлаштириш қанча туриши, ҳужжатни йўқотганлик учун қандай жарима белгилангани ва паспорт хорижда йўқолган бўлса, нима қилиш кераклиги ҳақида маълумот берамиз.
Паспорт ёки ИД-карта йўқолганда нима қилиш керак?
Агар эски намунадаги биометрик паспорт ёки ИД-картангиз йўқолса, миграция ва фуқароликни расмийлаштириш бўлимига (паспорт столи) ёки Давлат хизматлари марказига мурожаат қилиб, ҳужжат йўқолгани ҳақида хабар бериш керак. Эски намунадаги биометрик паспорт йўқолганда янги ИД-карта расмийлаштирилади, ИД-карта йўқолганда эса йўқолган картанинг ўрнига янги ИД-карта берилади.
Йўқолганлик ҳақидаги ариза рўйхатга олингач, ҳужжат ҳақиқий эмас деб топилади. Агар йўқолган ҳужжат янги ҳужжат олинмагунча топилса, ёзма ариза бериш орқали уни расмийлаштириш жараёнини тўхтатиш мумкин. Агар ҳужжат янги ҳужжат олингандан кейин топилса, уни ички ишлар органларига топшириш керак.
Аризани my.gov.уз портали орқали — «ИД-картани олиш ёки алмаштириш учун ариза бериш» хизмати орқали топшириш мумкин.
Анкетада «Йўқолган ёки яроқсиз ҳолга келган паспортни алмаштириш» сабабини танлаш, вилоят, туман ва ўзига қулай бўлган паспорт столини, шунингдек, ташриф буюриш санасини кўрсатиш керак. Сўнг ҳужжат тури ва мобил телефон рақами киритилади.
Анкетани тўлдиргандан кейин аризани юборинг ва хизмат ҳақини тўланг. Шундан сўнг танланган паспорт столига боринг. У ерда маълумотлар текширилади, бармоқ излари олинади ва суратга туширилади.
Муҳим: my.gov.уз орқали ариза бериш ва ташриф вақтини танлаш мумкин, аммо ИД-картани масофадан туриб олиш мумкин эмас.