Ўзбекистонлик шифокор самолётда аҳволи ёмонлашган аёлга тиббий ёрдам кўрсатди
Кореяга учаётган самолётда йўловчи аёлнинг қон босими кескин тушиб кетиб, оғир шок ҳолати юзага келди. Ўзбекистонлик шифокор унга тиббий ёрдам кўрсатди, бошқа йўловчилар ҳам ёрдам беришди.
Ўзбекистонлик шифокор самолётда аҳволи ёмонлашган аёлга тиббий ёрдам кўрсатди
11 октябрь куни Ўзбекистондан Жанубий Кореяга учиб кетаётган самолёт бортида ўзбекистонлик шифокор Ҳасан Комилов аҳволи ёмонлашган аёлга ёрдам берди. Бу ҳақда Threads тармоғида рейси йўловчиларидан бири ёзди.
Йўловчининг сўзларига кўра, эҳтимол корея миллатига мансуб аёлнинг диастолик (пастки) қон босими 20 гача тушиб кетган ва унда оғир шок ҳолати бошланган. Шу пайтда самолётда бўлган ўзбекистонлик шифокор унга ёрдам кўрсатган.
Шифокор вақти-вақти билан аёлга кислород бериб турган ва дексаметазон инъекциясини қилган. Натижада аёл Кореяга эсон-омон учиб келган.
Ҳодиса гувоҳи, шунингдек, бортдаги бошқа ўзбекистонликлар ҳам ёрдам беришга шошганини таъкидлади. Улар аёлга сув, конфетлар, шоколад, ёстиқ ва адёллар беришган. Борт кузатувчилари ҳам ёрдам кўрсатишда фаол иштирок этишган.
«Ростини айтсам, мен уларнинг барчасига тан бердим. Мен Ўзбекистонга биринчи марта келдим ва ўзбекистонликларнинг меҳрибонлигидан жуда таъсирландим. Инсон ҳаётини сақлаб қолишдан кўра шарафлироқ касб бўлмаса керак»,
— деб ёзди йўловчи.
Унинг сўзларига кўра, аёлга ёрдам кўрсатган ўзбекистонлик шифокор Кореяга малака ошириш учун келган бўлиши мумкин.