Ўзбекистондаги 3-МФФ 10 млн. тонна рудани қайта ишлади
Олмалиқ КМКнинг 3-мис бойитиш фабрикаси 2026 йилнинг март ойидан ноябрь ойигача 10 млн тонна маъданни қайта ишлади ва 160 минг тоннадан ортиқ концентрат ишлаб чиқарди.
Ўзбекистондаги 3-бойитиш фабрикаси 10 млн тонна маъданни қайта ишлади
Олмалиқ кон-металлургия комбинатининг (ОКМК) 3-Мис бойитиш фабрикаси (3-МБФ) 2026 йилнинг 16 мартидан 4 ноябригача бўлган даврда 10 млн тонна маъданни қайта ишлади.
Шу давр мобайнида мис эритиш заводига 160 минг тоннадан ортиқ мис конценрати ҳам етказиб берилди.
Ушбу ишлаб чиқариш маррасига эришилгани ҳақида фабрика раҳбарияти ОКМК бошқаруви раиси Абдулла Хурсановга ҳисобот берди.
Янги корхона учун бу ишга туширилган пайтдан бери биринчи йирик натижа бўлиб, ишлаб чиқариш қувватларини ўзлаштириш босқичларидан бирига айланди.
3-МБФ ўз ишини 2026 йил 16 мартда бошлаган. Ўша куни Ўзбекистон Президенти Шавкат Мирзиёев корхонани ишга тушириш рамзий тугмасини босган эди. Фабрика «Ёшлик I» конини ўзлаштириш лойиҳасининг асосий объектлари қаторига киради.
Корхонанинг лойиҳавий қуввати йилига 60 млн тонна маъданни қайта ишлашга мўлжалланган. Тўлиқ қувватга чиққач, фабрика ҳар йили 900 минг тоннага яқин мис концентратини ишлаб чиқариш имконига эга бўлади.
Қайта ишлаш ҳажмлари босқичма-босқич ошиб борди. Март ойида бу кўрсаткич 661,5 минг тонна маъданни ташкил этган бўлса, июнь ойида — 1 млн 161 минг 805 тоннани, октябрь ойида эса 1,6 млн тоннадан ошди. Шу тариқа, октябрь ойидаги ҳажм март ойидагига қараганда деярли 2,5 баравар юқори бўлди.
Фабрикада 12 та тегирмон ўрнатилган бўлиб, улардан 10 таси аллақачон фойдаланишга топширилган. Қолган иккитасида созлаш ва синов ишлари давом этмоқда. Уларни ишлаб чиқаришга улаш яқин орада кутилмоқда.
10 млн тонналик кўрсаткич корхонани ўзлаштириш жараёнидаги оралиқ натижа бўлди. Бундан кейин лойиҳавий қувватга босқичма-босқич чиқиш, технологик жараёнларни барқарорлаштириш ва мис концентратининг зарур сифатини таъминлаш вазифалари турибди.