Ўзбекистонда оммавий тадбирлар пайтида очиқ майдонлардаги одамлар сонини чекламоқчилар
Ўзбекистонда оммавий тадбирлар вақтида очиқ майдонлардаги одамлар сонига чекловлар жорий этиш мўлжалланмоқда
Ўзбекистон Ички ишлар вазирлиги оммавий тадбирларни ўтказишнинг янги қоидалари лойиҳасини тайёрлади. Ҳужжатда очиқ майдонларда ташриф буюрувчилар сонини чеклаш, иштирокчиларнинг хулқ-атворига қўшимча талаблар белгилаш ва жамоат хавфсизлигини таъминлаш бўйича чора-тадбирларни назарда тутиш таклиф қилинмоқда.
Лойиҳага кўра, стационар ўтириш жойлари бўлмаган очиқ майдонларда фойдали майдоннинг ҳар бир квадрат метрига бир кишидан ортиқ тўғри келмаслиги керак. Қўшимча хавф-хатарлар мавжуд бўлган тақдирда, ташриф буюрувчиларнинг рухсат этилган сони камайтирилиши мумкин.
Ҳужжатда, шунингдек, маҳсулот ва товарларни бепул тарқатиш орқали ташриф буюрувчиларни жалб қилишга чекловлар, тадбир ўтказиладиган жойдан 500 метр радиусда алкоголь сотишни чеклаш, маст ҳолатда пайдо бўлиш, юзни тўсиб олиш ва саҳнага ёки спорт майдонига ўзбошимчалик билан чиқишни тақиқлаш назарда тутилган. Шу билан бирга, санаб ўтилган талабларнинг бир қисми, жумладан, 2024 йил июнь ойида жорий этилган одамларни бепул совғалар билан жалб қилиш тақиқи амалдаги қонунчиликда аллақачон мустаҳкамлаб қўйилган.
Тартибни бузганлик учун кейинги оммавий тадбирларга киришни вақтинча чеклаш назарда тутилган. Қоидабузарларнинг электрон ҳисоби ички ишлар органлари томонидан юритилиши керак. Лойиҳанинг жамоатчилик муҳокамаси 20 ноябргача давом этади.
Аввалроқ Ўзбекистонда жамоат тартибини бузган фуқароларнинг оммавий тадбирларга ташриф буюришини вақтинча чеклашга қарор қилингани ҳақида хабар берилган эди.