Ўзбекистонда Маҳалла марказлари биноларини дўконлар, гўзаллик салонлари ва устахоналар учун ижарага бериш таклиф қилинди

Ўзбекистонда маҳалла марказлари хоналарини дўконлар, салонлар ва устахоналар учун ижарага бериш таклиф этилди

Ўзбекистонда Маҳалла ва маиший хизмат кўрсатиш марказларининг бино ва ускуналарини тадбиркорларга ижарага бериш таклиф қилинди. Ижарадан тушган маблағларни маҳаллий бюджетларга, маҳалла жамғармаларига ва Давлат активларини бошқариш агентлигига ўтказиш режалаштирилмоқда.

Тегишли лойиҳа Иқтисодиёт ва молия вазирлиги томонидан тайёрланди. Ҳужжат норматив-ҳуқуқий ҳужжатлар лойиҳалари муҳокамаси порталида эълон қилинган.

Гап Ислом тараққиёт банки ва ОПЕК Халқаро тараққиёт жамғармаси иштирокидаги «Қишлоқ ҳудудларини барқарор ривожлантириш» лойиҳаси доирасида қурилган Маҳалла марказлари ҳақида бормоқда. Лойиҳа Қорақалпоғистон, Бухоро, Навоий ва Хоразм вилоятларининг 20 та туманидаги 170 та маҳаллада — 40 та марказий ва 130 та туташ маҳаллаларда амалга оширилмоқда.

Ҳозирги вақтда мебел ва ускуналар билан тўлиқ жиҳозланган 40 та Маҳалла маркази фойдаланишга топширилган. Таклиф этилаётган тартиб келгусида халқаро молия институтлари маблағлари ҳисобидан қуриладиган марказларга ҳам татбиқ этилади.

Лойиҳага кўра, марказларнинг маъмурий эҳтиёжлар учун мўлжалланмаган хоналари E-auksion орқали рақобат асосида ижарага берилади. Савдолар ҳақидаги эълон камида 30 иш куни олдин эълон қилиниши керак. Ижара шартномалари бинолар балансида бўлган туман ҳокимликлари томонидан тузилади.

Марказларда маиший хизмат кўрсатиш шохобчаларини жойлаштириш таклиф этилмоқда: сартарошхоналар, гўзаллик салонлари, кимёвий тозалаш шохобчалари, техника таъмирлаш устахоналари, тикувчилик корхоналари ва фитнес заллари. Бундан ташқари, хоналардан ўқув ва касб-ҳунарга йўналтириш марказлари, ёш тадбиркорлар учун маслаҳатхоналар, савдо ва ишлаб чиқариш учун фойдаланиш мумкин бўлади.

Хусусан, биноларда озиқ-овқат дўконлари ва қандолатчилик цехларини жойлаштиришга, ертўлаларда эса мева-сабзавот маҳсулотларини сақлаш, қайта ишлаш ва қадоқлашни ташкил этишга рухсат берилади.

Марказларнинг хоналари маъмурий, ижтимоий, тижорат ва умумий фойдаланишдаги хоналарга бўлинади.

Маъмурий хоналар ижарага берилмайди.

Бир квадрат метр учун йиллик ижара ҳақи миқдори минимал ставка, ҳудудий зона, бино тури, туташ ҳудуддан фойдаланиш ва объектнинг тижорат жозибадорлигини ҳисобга олган ҳолда ҳисобланади. Бухоро вилояти учун 2,0, Навоий вилояти учун — биринчи-учинчи қаватлар учун 2,0 ва ертўлалар учун 1,2, Хоразм вилояти учун — 1,5, Қорақалпоғистон учун — 1,8 коэффициенти назарда тутилган.

Ижара ҳақидан ташқари, тадбиркорлар коммунал хизматлар, умумий фойдаланишдаги хоналарни сақлаш харажатларидаги ўз улушини ва ижара ҳақининг 5 фоизи миқдорида жорий таъмирлаш учун ажратмаларни тўлайдилар. Шартнома, хусусан, кетма-кет икки ойдан ортиқ тўлов амалга оширилмаганда бекор қилиниши мумкин.

Бино ва ускуналар ижарасидан тушадиган маблағларни беш иш куни ичида тақсимлаш таклиф этилмоқда. 40 фоизи маҳаллий бюджетга, яна 40 фоизи — ускуналарни ишлатиш, таъмирлаш ва янгилаш учун маҳалла жамғармасига, 20 фоизи — Давлат активларини бошқариш агентлигига йўналтирилади.

Бунда маҳалла жамғармасининг улуши марказнинг барқарор ишлашини таъминлаш учун зарур бўлган суммадан кам бўлмаслиги керак. Белгиланган пропорцияларни Вазирлар Маҳкамасининг алоҳида қарори билан ўзгартириш мумкин бўлади.

Бино ва ускуналардан фойдаланилиши устидан уч босқичли назорат ўрнатиш режалаштирилмоқда. Маҳалла фуқаролар йиғини ҳар ойда ҳокимликка ҳисобот беради, туман ҳокимлиги эса ҳар чоракда туман Халқ депутатлари Кенгашига даромадлар тўғрисида маълумот тақдим этади.

Ҳар йили даромадлар ва харажатлар сметаси тузилади ва у Кенгаш томонидан тасдиқланиши керак. Назорат, шунингдек, Маҳаллалар уюшмаси туман бўлимига Маҳаллани қўллаб-қувватлаш кенгаши билан биргаликда ҳамда Давлат активларини бошқариш агентлигининг ҳудудий бўлинмасига юкланади.

Лойиҳа муҳокамаси 18 октябргача давом этади.