Ўзбекистонда илк бор беморга бир вақтнинг ўзида жигар ва буйрак кўчириб ўтказилди
Операция жигар сиррози ва сурункали буйрак етишмовчилигининг терминал босқичидан азият чеккан, тўрт йил давомида гемодиализ олган беморда бажарилди.
Ўзбекистонда биринчи марта беморга бир вақтнинг ўзида жигар ва буйрак кўчириб ўтказиш операцияси муваффақиятли амалга оширилди. Ушбу мураккаб жарроҳлик амалиёти Миллий тиббиёт марказида ўтказилди.
Операция жигар сиррози ва сурункали буйрак етишмовчилигининг сўнгги босқичидан азият чеккан беморда бажарилди. Маълумотларга кўра, бемор тўрт йил давомида гемодиализ муолажасини олган.
Шифокорларнинг таъкидлашича, бундай оғир ҳолатларда фақат жигарни ёки фақат буйракни кўчириб ўтказиш кутилган натижани бермаслиги мумкин. Шу боис, иккала органни бир вақтнинг ўзида трансплантация қилиш беморнинг ҳаётини сақлаб қолиш учун ягона самарали ечим деб топилди.