Ўзбекистонда илк бор беморга бир вақтнинг ўзида жигар ва буйрак кўчириб ўтказилди

Ўзбекистонда илк бор бир беморга жигар ва буйрак бир вақтнинг ўзида кўчириб ўтказилди. Бу ҳақда “Замон” информацион дастури хабар берди.

Миллий тиббиёт марказида амалга оширилган ушбу мураккаб операция жигар сиррози ва сурункали буйрак етишмовчилигининг терминал босқичидан азият чеккан, тўрт йил давомида гемодиализ олган беморда бажарилди.

Самарқанд вилояти Пахтачи туманида яшовчи аёл саккиз йилдан бери жигар касаллиги билан курашиб келган. Кейинчалик унинг буйраклари ҳам фаолиятини йўқотган ва у тўрт йил давомида мунтазам гемодиализ олишга мажбур бўлган.

Беморнинг гепатит С билан касаллангани натижасида жигар сиррози ҳам ривожланган. Унга аввал операцияни хорижда, жумладан, Ҳиндистонда ўтказиш тавсия қилинган, бироқ донор ва даволаниш харажатлари учун маблағ топиш имкони бўлмаган.

Шифокорларнинг таъкидлашича, бундай ҳолатда фақат жигар ёки фақат буйракни кўчириб ўтказиш етарли натижа бермаслиги мумкин. Шу сабабли иккала органни бир вақтнинг ўзида трансплантация қилиш беморнинг ҳаётини сақлаб қолиш имконини берадиган ягона ечим сифатида кўрилган.

Миллий тиббиёт марказида беморга юқори технологияли операция ўтказилиб, ҳам жигар, ҳам буйрак кўчириб ўтказилди. Мутахассислар бундай мураккаб амалиётлар одатда трансплантология ривожланган давлатларда бажарилишини таъкидлаган.

Шифокорлар мазкур амалиёт Ўзбекистон тиббиётида оғир жигар ва буйрак етишмовчилиги билан яшаётган беморларга юқори технологияли трансплантация ёрдамидан фойдаланиш имкониятларини кенгайтиришини қайд этган.