Ўзбекистонда дори-дармонларни онлайн сотиш ва уларни харидорларга етказиб бериш қоидалари белгиланади
Ўзбекистонда дори-дармонларни онлайн сотиш ва уларни харидорларга етказиб бериш қоидаларини белгилаш назарда тутилмоқда
Ўзбекистонда дори воситаларини сотиш, сақлаш ва етказиб бериш тартибини янгилаш режалаштирилмоқда. Соғлиқни сақлаш вазирлиги лойиҳасида рецептсиз бериладиган препаратлар ва айрим тиббий буюмларни онлайн буюртма қилиш имконияти кўзда тутилган, шунингдек, дорихоналар ва курьерлик хизматларига янги талаблар жорий этилмоқда.
Онлайн-сотув билан фақат дорихоналар ва уларнинг филиаллари шуғулланиши мумкин бўлади. Етказиб беришни ўз кучлари билан ёки маркетплейслар ва агрегаторлар орқали ташкил этишга рухсат берилади. Алоҳида ҳарорат режимини талаб қиладиган препаратлар учун совутгич ускуналари ёки термоконтейнерлари бўлган транспорт талаб этилади. Дориларни бошқа юклар билан бирга ташиш тақиқланади.
Дорихоналар харидорларга препарат ҳақида тўлиқ маълумотни: номи, дозаси, серияси, яроқлилик муддати, нархи ва қўллаш бўйича йўриқномасини тақдим этиши шарт бўлади. Препаратнинг тўғри берилиши ва маълумотларнинг ҳаққонийлиги учун фармацевт шахсан жавобгар бўлади.
Лойиҳа харидорлар ҳимоясини кучайтиради: агар ўров шикастланган бўлса ёки буюртма мос келмаса, харид қилишдан воз кечиш мумкин бўлади. Сохталаштириш ёки сифатсизлик шубҳаси туғилганда, препарат сотувдан вақтинча олиб ташланади, маълумотлар эса Фармацевтика маҳсулотлари хавфсизлиги марказига топширилади.
Хавфли ва сифатсиз дорилар учун хавф даражасига қараб 24–72 соат ичида сотувдан қайтариб олиш тартиби жорий этилмоқда. Бундай ҳолатлар ҳақида веб-сайт, ОАВ ва ижтимоий тармоқлар орқали хабар берилади.
Бундан ташқари, фойдаланишга яроқсиз препаратларни йўқ қилиш қоидалари кучайтирилади: дорилар юқори ҳароратда зарарсизлантирилиши ва ёқилиши, тирик микроорганизмлари бўлган препаратлар эса дезинфекциядан ўтиши керак.
Лойиҳани 2026 йил 19 ноябргача муҳокама қилиш мумкин.
Рақобат қўмитаси харидоргир дориларни сотиб олишда улгуржи етказиб берувчилар қўшимча равишда буюртма қилинмаган препаратларни ҳам харид қилишни талаб қилаётгани бўйича дорихоналарнинг шикоятларини ўрганмоқда.