Ўзбекистон ва Хитой қурилиш соҳасидаги лойиҳаларни муҳокама қилди
Ўзбекистон Қурилиш вазирлиги ва Хитой компаниялари индустриал қурилиш, иссиқлик таъминоти, EPC-лойиҳалар ҳамда янги технологияларни жорий этишни муҳокама қилдилар.
Ўзбекистон ва Хитой қурилиш соҳасидаги лойиҳаларни муҳокама қилди
Ўзбекистонда Хитой компаниялари билан қурилиш ва уй-жой коммунал хўжалиги соҳаларида ҳамкорлик истиқболлари, жумладан, иссиқлик таъминотини модернизация қилиш ва инвестиция лойиҳаларини амалга ошириш масалалари кўриб чиқилди.
Қурилиш ва уй-жой коммунал хўжалиги вазирлигида «Чина Раилвай Префабрисатед Хинжианг Сонструстион Девелопмент Со., Лтд.» ва «Ҳенгканг Течнологй Кеня Со., Лтд.» делегацияси билан учрашув бўлиб ўтди.
Музокаралар давомида томонлар ўзаро манфаатли ҳамкорликни кенгайтириш, замонавий технологияларни жорий этиш ҳамда қурилиш ва коммунал соҳаларда истиқболли лойиҳаларни амалга ошириш имкониятларини муҳокама қилдилар.
Йиғма ва индустриал қурилиш ечимларидан кенг фойдаланишга алоҳида урғу берилди. Иштирокчилар, шунингдек, экологик тоза қурилиш материалларини қўллаш, пўлат конструкциялар ишлаб чиқариш ва EPC шартлари асосида комплекс лойиҳаларни амалга оширишни ҳам тилга олдилар.
Бундан ташқари, томонлар EPC+F ва давлат-хусусий шериклик шартлари асосида қурилиш ва коммунал инфратузилма соҳасидаги лойиҳаларни ҳаётга татбиқ этиш истиқболларини кўриб чиқдилар.
Музокараларнинг алоҳида мавзуси Ўзбекистонда иссиқлик таъминоти тизимларини модернизация қилиш бўлди. Томонлар когенерация станциялари ва замонавий иссиқлик марказларини қуриш, шунингдек, геотермал иссиқлик насослари технологияларини жорий этишни муҳокама қилдилар.
Муҳокама якунларига кўра, иссиқлик таъминоти соҳасидаги истиқболли лойиҳалар тўғрисида маълумот алмашиш бўйича келишувга эришилди. Хитой компаниялари таклиф этилган лойиҳаларни ўрганиб чиқади ва уларни молиялаштириш ҳамда ҳамкорлик қилишнинг эҳтимолий шартлари бўйича таклифлар тайёрлайди.
Учрашув иштирокчилари, шунингдек, йиғма қурилиш соҳасида қўлланиладиган Хитой стандартлари ва техник талабларини ўрганиш масалаларини ҳам кўриб чиқдилар.
Томонлар қурилиш жараёнлари самарадорлигини ошириш ва уларнинг экологияга таъсирини камайтириш учун илғор технологияларни жорий этиш муҳимлигини таъкидладилар.
Учрашув якунида томонлар музокараларни ишчи тартибда давом эттириш ҳамда лойиҳа ва техник ҳужжатлар билан алмашишга келишиб олдилар.
Бундан ташқари, қурилиш, уй-жой коммунал инфратузилмаси ва иссиқлик таъминоти соҳаларида аниқ лойиҳаларни амалга ошириш учун самарали ҳамкорлик механизмларини ишлаб чиқиш режалаштирилган.