Ўзбекистон ва Парламентлараро иттифоқ ҳамкорликнинг янги йўналишларини муҳокама қилди
Танзила Нарбаева ва Парламентлараро иттифоқ бош котиби Анда Филип ҳамкорликни ривожлантириш ва янги қўшма ташаббусларни муҳокама қилдилар.
Ўзбекистон ва Парламентлараро иттифоқ ҳамкорликнинг янги йўналишларини муҳокама қилди
Ўзбекистон Олий Мажлиси Сенати Раиси Танзила Нарбаева Ёш парламент аъзоларининг XII глобал конференцияси доирасида Парламентлараро иттифоқ бош котиби Анда Филип билан учрашди.
Олий Мажлис Сенати хабар беришича, томонлар ҳамкорликнинг бугунги ҳолати, эришилган натижалар ва ҳамкорликнинг устувор йўналишларини кўриб чиқдилар.
Анда Филип Ўзбекистоннинг Парламентлараро иттифоқ билан ҳамкорликни ривожлантиришга қаратилган ташаббусларини юқори баҳолади.
Мамлакатнинг халқаро парламентлараро мулоқотдаги фаол иштирокининг муҳим натижалари қаторида Бухорода Барқарор ривожланиш мақсадларини амалга оширишда парламентлараро ҳамкорлик бўйича Глобал форум, Тошкентда Дунё парламентлари аёл раҳбарларининг саммити, шунингдек, Самарқанд ва Бухорода Осиё хотин-қизлар форумлари ўтказилгани қайд этилди.
2025 йил апрель ойида Тошкентда бўлиб ўтган Парламентлараро иттифоқнинг 150-юбилей Ассамблеяси алоҳида таъкидланди. Ушбу тадбир ташкилотнинг Марказий Осиёдаги илк шундай йиғилиши бўлди.
Учрашувда, шунингдек, Ўзбекистон ташаббуси билан қабул қилинган ҳамда халқаро ва глобал жараёнларда парламентлар ролини кучайтиришга қаратилган БМТ Бош Ассамблеяси резолюцияларининг аҳамияти таъкидланди. Ушбу ташаббуслар мамлакат парламент дипломатиясининг муҳим йўналишларидан бири сифатида эътироф этилди.
Томонлар Парламентлараро иттифоқнинг янги Стратегияси доирасида ҳамкорликни янада ривожлантиришга алоҳида эътибор қаратдилар.
Учрашув иштирокчилари парламентлараро алоқаларни мустаҳкамлаш, тажриба алмашишни кенгайтириш, янги қўшма ташаббусларни илгари суриш ва амалий лойиҳаларни ҳаётга татбиқ этиш масалалари бўйича фикр алмашдилар.