Ўзбекистон Сенати Миллий гвардиянинг вазифа ва ваколатларини аниқлаштирди

Ўзбекистон Сенати Миллий гвардиянинг вазифа ва ваколатларига аниқлик киритди

Ўзбекистон Сенатининг ялпи мажлисида Миллий гвардия тўғрисидаги қонунчиликка ўзгартиш ва қўшимчалар киритиш ҳақидаги қонун кўриб чиқилди. Ушбу ҳужжат тўпланган амалий тажриба ва замонавий талабларни ҳисобга олган ҳолда унинг вазифа ва ваколатларига аниқлик киритишга қаратилган. Муҳокама якунларига кўра, сенаторлар қонунни маъқулладилар.

Миллий гвардия 2017 йилда ташкил этилган бўлиб, унинг ҳуқуқий мақоми 2020 йилда алоҳида қонун билан мустаҳкамланган эди. Кейинги йилларда идора фаолиятини тартибга солувчи ҳамда унинг янги вазифа ва ваколатларини белгиловчи 20 дан ортиқ қонун ва 70 дан зиёд фармон ва қарорлар қабул қилинди.

Шу билан бирга, амалиёт Миллий гвардиянинг айрим функцияларини қайта кўриб чиқиш, бир-бирини такрорловчи нормаларни бартараф этиш ва мавжуд ҳуқуқий бўшлиқларни тўлдириш зарурлигини кўрсатди.

Қонуннинг асосий қоидаларидан бири Миллий гвардия органлари асосий вазифаларининг янги тизимлаштирилиши бўлди. Хусусан, жамоат хавфсизлиги ва тартибини таъминлаш, шунингдек, қўриқлаш фаолияти бўйича функциялар бирлаштирилмоқда. Шу билан бирга, оммавий тартибсизликларни бартараф этиш ҳам вазифалар қаторига киритилмоқда.

Шунингдек, давлат объектларини, ўта муҳим ва тоифаланган объектларни, шунингдек, жисмоний ва юридик шахсларнинг бошқа объектлари ва мол-мулкини қўриқлаш бўйича функцияларга аниқлик киритилмоқда. Улар амалдаги қонунчиликда назарда тутилган ваколатларга мувофиқлаштирилмоқда.

Миллий гвардия ҳарбий хизматчиларининг фуқаролар билан ўзаро муносабатларига алоҳида эътибор қаратилган. Ҳарбий хизматчи фуқарога мурожаат қилганда ўз лавозими, ҳарбий унвони, фамилияси, исми ва отасининг исмини айтиб, ўзини таништириши, мурожаат қилиш сабаби ва мақсадини тушунтириши шарт. Фуқаронинг талабига кўра, у ўз шахсини тасдиқловчи гувоҳномани ҳам кўрсатиши шарт.

Қонунда, шунингдек, жамоат хавфсизлигини таъминлашда Миллий гвардиянинг замонавий махсус воситаларни қўллаш борасидаги ҳуқуқларига аниқлик киритилмоқда.

Сенаторларнинг баҳолашича, киритилган ўзгартишлар Миллий гвардиянинг вазифа ва ваколатларини унинг амалдаги функцияларига мувофиқ аниқроқ белгилаш, шунингдек, ҳарбий хизматчиларнинг фуқаролар билан ўзаро муносабатларида қонунийлик ва очиқлик даражасини ошириш имконини беради.