Ўзбекистонда байрам кунларини белгилаш ва нишонлаш тартиби қонун билан тартибга солиняпти

Ўзбекистонда байрам кунларини белгилаш ва нишонлаш тартиби қонун билан тартибга солинмоқда

Ўзбекистонда байрам кунларини белгилаш, ташкил этиш ва ўтказишнинг ягона тартибини жорий этишни назарда тутувчи «Байрам кунлари тўғрисида»ги қонун лойиҳаси тайёрланди.

Ҳужжатга мувофиқ, мамлакатдаги байрам кунларини тўрт тоифага ажратиш таклиф қилинмоқда: умумхалқ байрамлари, касб байрамлари, муҳим саналарга оид байрамлар ва халқаро саналарга оид байрамлар.

Лойиҳада 9 та умумхалқ байрами белгиланган. Улар орасида Янги йил, Хотин-қизлар куни, Наврўз, Хотира ва қадрлаш куни, Мустақиллик куни, Ўқитувчи ва мураббийлар куни, Конституция куни, шунингдек, Рўза ва Қурбон ҳайитларининг биринчи кунлари бор.

Мазкур умумхалқ байрамлари ишланмайдиган кунлар сифатида белгиланиши кўзда тутилмоқда.

Қонун лойиҳасида касб байрамларининг ҳам ягона рўйхати келтирилган. Жумладан, 27-июн — Матбуот ва оммавий ахборот воситалари ходимлари куни, 20-август — Тадбиркорлар куни, 25-октябр — Ички ишлар органлари ходимлари куни ва 11-ноябр — Ўзбекистон касаба уюшмалари куни сифатида белгиланган.

Таклиф этилаётган тартибга кўра, умумхалқ ва касб байрамлари қонун билан, муҳим саналар Президент фармонлари ва қарорлари асосида, халқаро саналарга оид байрамлар эса Вазирлар Маҳкамаси томонидан белгиланиши мумкин.

Шунингдек, байрам тадбирларини ташкил этишда жамоат хавфсизлиги, тиббий хизмат, ёнғин ва санитария қоидаларига риоя этиш бўйича масъул ташкилотларнинг вазифалари аниқлаштирилмоқда.

Лойиҳада байрам муносабати билан иш берувчилар ходимларга қўшимча рағбатлантирувчи мукофот тўлаши мумкинлиги ҳам назарда тутилган.

Бундан ташқари, миллий, ирқий, этник ёки диний адоват қўзғатишга ундовчи байрамларни нишонлаш тақиқланиши белгиланмоқда.

Эслатиб ўтамиз, мазкур ҳужжат ҳозирча қонун лойиҳаси бўлиб, ундаги нормалар тегишли жараёнлардан сўнг кучга киради.