Ўзбекистонда 9 ойда хазон ва ўсимлик қолдиқларини ёқиш бўйича 4,1 мингдан ортиқ ҳуқуқбузарлик аниқланди

Ўзбекистонда 9 ой ичида хазон ва ўсимлик қолдиқларини ёқиш билан боғлиқ 4,1 мингдан ортиқ ҳуқуқбузарлик қайд этилди

Ўзбекистонда 2026-йилнинг ўтган даврида барг-хазон ва ўсимлик қолдиқларини ёқиш билан боғлиқ 4 минг 100 дан ортиқ ҳолат бўйича маъмурий баённомалар тузилди.

Бундай чиқиндилар ёқилганда атмосфера ҳавосига ис гази, азот оксидлари, майда дисперс заррачалар ва бошқа зарарли бирикмалар чиқади. Тутун аҳоли яшаш ҳудудларига тарқалиб, ҳаво сифатининг ёмонлашувига олиб келади. Маълум қилинишича, Экополиция ушбу ҳуқуқбузарликларнинг олдини олиш мақсадида кучайтирилган назорат тадбирларини олиб бормоқда.

Шунингдек, “Ўзбеккосмос” агентлиги билан ҳамкорликда ғалладан бўшаган майдонларда сомонпоя қолдиқларини ёқиш ҳолатлари аерокосмик технологиялар ёрдамида кузатиб борилмоқда. Давлат космик мониторинги дастури доирасида 915 та шундай ҳолат аниқланиб, айбдор шахсларга маъмурий жарималар қўлланган. Ёнғин юз берган экин майдонининг ҳар бир гектари учун қонунчиликда белгиланган тартибда зарар ҳисобланади.

Амалдаги қонунчиликка кўра, дала ва аҳоли пунктларида хазон, анғиз, шох-шабба ҳамда бошқа ўсимлик қолдиқларини ёқиб, атмосфера ҳавосини ифлослантириш тақиқланган. Маъмурий жавобгарлик тўғрисидаги кодекснинг 88-моддаси учинчи қисмига мувофиқ, бу ҳуқуқбузарлик учун фуқароларга 1 миллион 320 минг сўмдан 2 миллион 200 минг сўмгача, мансабдор шахсларга эса 8 миллион 800 минг сўмдан 13 миллион 200 минг сўмгача жарима белгиланган.

Ҳуқуқбузарлик маъмурий жазо қўлланганидан кейин бир йил ичида такрор содир этилса, фуқароларга 3 миллион 80 минг сўмгача, мансабдор шахсларга эса 22 миллион сўмгача жарима солиниши мумкин. Экология қўмитаси фуқаролардан хазон ва ўсимлик қолдиқларини ёқиш ҳолатлари ҳақида 1157 қисқа рақами ёки @эсоговуз_бот Телеграм боти орқали хабар беришни сўради.