Ўзбекистон банклари талабаларга 115,9 млрд сўм кредит берди

Ўзбекистон банклари талабаларга 115,9 млрд сўм кредит ажратди

Ўзбекистон тижорат банклари 2026 йилнинг биринчи ярмида талабаларга жами 115,9 млрд сўм миқдорида имтиёзли таълим кредитлари берди. Бу кредитлардан 8 946 нафар талаба фойдаланган. Бу ҳақда Ўзбекистон Республикаси Иқтисодиёт ва молия вазирлиги маълум қилди.

Қарз олувчиларнинг 1 848 нафари фоизли, 7 098 нафари эса фоизсиз кредит олган.

Ажратилган маблағларнинг энг катта улуши — 89,4 млрд сўм, яъни умумий ҳажмнинг 77,1 фоизи талаба қизларга берилган фоизсиз кредитлар ҳиссасига тўғри келган. Банклар фоизли кредитлар учун 26,6 млрд сўм маблағ ажратган.

Вазирлик маълумотига кўра, энг кўп таълим кредити Халқ банки томонидан берилган бўлиб, 3 386 нафар талабага 42,4 млрд сўм кредит ажратилган. Агробанк 1 726 нафар талабага 21,4 млрд сўм, Бизнесни ривожлантириш банки эса 1 296 нафар талабага 14,9 млрд сўм кредит тақдим этган.

Ўзсаноатқурилишбанк 678 нафар қарз олувчига 12,6 млрд сўм, Ўзмиллийбанк 862 нафар қарз олувчига 10,1 млрд сўм, Ҳамкорбанк эса 385 нафар қарз олувчига 6,1 млрд сўм кредит ажратган.

Асакабанк, Алоқабанк, Туронбанк, ОриентФинансБанк ва Микрокредитбанкнинг ҳар бири 349 млн сўмдан 3,4 млрд сўмгача маблағ ажратган бўлиб, ушбу банклар орқали жами бир неча юз нафар талаба кредит билан қамраб олинган.