ОТМга киришда 234 минг абитуриент қониқарсиз балл тўплади
Ўқишга кириш учун камида 56,7 балл (максимал баллнинг 30 фоизи) тўплаш талаб этилади. Бу йил жами абитуриентларнинг 37,5 фоизи ана шу минимум баллни ҳам тўплай олмади. Аммо бу кўрсаткич йилдан йилга пасаймоқда, аввалги йилларда 56,7 балл тўплай олмаганлар улуши 40 фоиздан баланд эди. Шу билан бирга, давлат олийгоҳларига ўқишга ҳужжат топшираётганлар сони ҳам камаймоқда: уч йил олдин миллиондан ортиқ ёшлар бакалавриатга ҳужжат топширган эди, 2026-йилга келиб бу кўрсаткич 678 минггача (33 фоизга) камайди.
ОТМга кириш имтиҳонларида 234 мингга яқин абитуриент қониқарсиз натижа кўрсатди.
2026/27 ўқув йили учун давлат олий таълим муассасаларининг бакалавриат босқичига ҳужжат топширган 233 935 нафар абитуриент минимал ўтиш балли – 56,7 баллдан паст натижа қайд этди. Бу ҳақда олий таълим вазирининг биринчи ўринбосари Сардор Ражабов маълум қилди.
Ушбу кўрсаткич умумий абитуриентлар сонининг 37,54 фоизини ташкил этади. Сўнгги йилларда ўқишга кириш учун талаб қилинадиган минимал балл (максимал баллнинг 30 фоизи) – 56,8 баллдан кам тўплаган абитуриентлар улуши пасайиб бормоқда. Сардор Ражабовнинг сўзларига кўра, бу ҳолат абитуриентларнинг билим даражаси ва тест натижалари яхшиланиб бораётганидан далолат беради.
Бироқ, шуни таъкидлаш жоизки, сўнгги йилларда абитуриентлар сони ҳам умумий ҳисобда камайиб бормоқда. Жорий ўқув йилида давлат олийгоҳлари бакалавриатига ўқишга кириш учун 677,9 минг нафар абитуриент онлайн рўйхатдан ўтган. Таққослаш учун, 2024-йилгача бу кўрсаткич 1 миллиондан ортиқ эди.
2026-йилда ўқишга топширганлар сони 2023-йилга нисбатан қарийб 340 минг нафарга ёки 33 фоизга камайган. Абитуриентлар сонининг қисқаришига сиртқи таълимга қабулнинг тўхтатилиши ҳам таъсир қилган бўлиши мумкин.
Жорий йилда мактабни битирган ёшлар орасида 56,7 баллдан паст тўплаш ҳолатлари динамикаси юзасидан ҳозирча маълумотлар мавжуд эмас.
Қайд этиш керакки, жорий йилда давлат гранти асосида ўртача ўтиш бали 134,6 баллни, тўлов-контракт бўйича эса 93,7 баллни ташкил этди. Ўтган ўқув йилида бу кўрсаткичлар мос равишда 121,8 ва 84,9 балл бўлган эди.