Оператор аттракциондан йиқилиш оқибатидаги ўлим учун уч йилга уй қамоғига ҳукм қилинди
Tashkent Times — Ўзбекистоннинг барча сўнгги янгиликларини ёритиб борувчи инглиз тилидаги онлайн-газетадир
Аттракциондан йиқилиб ҳалок бўлиш ҳолати бўйича оператор уч йилга озодликни чеклаш жазосига ҳукм қилинди
Поп туманида яшовчи аёл 2026 йил 12 июнь куни қариндошлари билан боққа бориб, «Торнадо» номли аттракционга чиққан. Ҳужжатларга кўра, у пастга қайрилиш вақтида йиқилиб тушиб, боши билан аттракционнинг металл қисмига урилган ва воқеа жойида вафот этган.
Оператор дастлаб унинг аттракционга чиқишига рухсат бермаган, лекин кейинроқ фикрини ўзгартирган. «Марҳумага ёши катта ва вазни оғир бўлгани учун чиқиши мумкин эмаслигини айтдим. Лекин у узоқдан келганини ва чиқмаса армонда қолишини айтди. Шунинг учун рухсат бердим», — деди судланувчи. Унинг қўшимча қилишича, аёл вазни туфайли икки кишилик ўриндиққа ёлғиз ўзи ўтирган.
Аттракционга эгалик қилувчи хусусий фирма раҳбари судга маълум қилишича, ҳодисадан сўнг оператор металл хавфсизлик тўсиғи ёпилганини, аммо арқон билан боғланмаганини айтган.
Суд-тиббиёт экспертизаси аёлнинг бош суяги сингани ва мияси оғир шикастланганини аниқлади ҳамда ўлим сабаби сифатида бош мия жароҳатини кўрсатди.
Марҳуманинг ўғли судда айбланувчига нисбатан ҳеч қандай эътирози йўқлигини билдириб, енгиллик беришни сўради.
Чуст туман суди Ф.С. деб кўрсатилган айбланувчини Жиноят кодексининг 116-моддаси 3-қисми билан айбдор деб топди. шунингдек, унга барча турдаги аттракционларда масъулиятли лавозимларда ишлаш 2 йил муддатга ман этилди.
Аввалроқ Жиззах шаҳридаги истироҳат боғида аттракцион бузилиб кетиши оқибатида тўрт киши жароҳатлангани ва касалхонага ётқизилгани ҳақида хабар берилган эди.