Опа-сингил ҳалок бўлган. Наманганда катерлар тўқнашуви қандай рўй берган?
23-август куни Сирдарё дарёсининг Наманган вилояти Тўрақўрғон туманидан ўтувчи қисмида иккита катер тўқнашиб кетди. Бахциз ҳодиса оқибатида икки опа-сингил ҳалок бўлган. Катерни бошқарган ҳайдовчилардан бири шифохонада, яна бири терговга жалб қилинган. Kun.uz мухбири воқеа юзасидан гувоҳлар ва катер ҳайдовчиси билан суҳбатлашди.
Опа-сингилнинг ўлимига сабаб бўлган Намангандаги катерлар тўқнашуви қандай юз берди?
Маълум бўлишича, Тўрақўрғон туманининг бир қисмидан оқиб ўтувчи Сирдарё дарёси бўйида маҳаллий тадбиркорлар дам олиш масканлари ташкил этиб, катерда сайр қилиш хизматини ҳам йўлга қўйганлар.
23-август куни содир бўлган бахциз ҳодисада шу каби 10 та катердан 3 таси иштирок этган.
**"Катеримда 6 аёл бор эди..."**
Шифохонада даволанаётган катер ҳайдовчиси Нурмуҳаммад Ҳабибуллаевнинг сўзларига кўра: "Ўша куни катеримга олти нафар аёл киши олган эдим. Аёллар "секинроқ ҳайданг, орамизда ёши катталар бор, қўрқишади" дейишгани учун секин ҳайдадим. Ҳаракатланаётган пайтимда олдимдан иккита катер ўтди, уларга йўл бердим. Кейин секин ҳаракатланиб кетаётган вақтимда, бошқа бир катер чап тарафимдан келиб уриб, одамларимнинг устига чиқиб кетган... Агар ёнидан келиб урганда ўлим ҳолати бўлмаслиги керак эди. Катерни бошқариш учун Тошкентда ўқиб махсус гувоҳнома олганман."
**Катерлар фаолияти тўхтатилган**
Воқеа гувоҳи Абдулла Абдуманнонов шундай дейди: "23-август куни асрдан кейин дарёда тўполон бўлиб кетди. Қарасам, икки катер тўқнашган экан. Одамлар ҳалокатга учраганларга ёрдам бериш учун сувга тушишди. Сувда чўкиш ҳолати бўлмади – катерга чиққанларга одатда қутқарув нимчалари берилади, ҳаммада "жилет" бор эди. Шу воқеадан кейин катерларнинг ҳаммасини тортиб қўйишди, яъни олиб чиқиб ташлашди сувдан. Кутилмаган бахциз ҳодиса бўлди-да, дам олиш учун келган опа-сингиллар ҳалок бўлишди."
**"Ўғлим 8 йилдан бери катер ҳайдар эди"**
"Дарёнинг бўйида тадбиркорлик фаолиятини йўлга қўйганмиз. Ўша куни ўғлим мижозларини катерига солиб, тепа томонга ҳайдаган. Кўприк тагида бошқа бир катерлардан бири бузилиб қолган экан. Ўша бузилиб қолган кемани четроққа олишаётган бир пайтда, ўғлим бошқарувидаги катер тўсатдан тепадан келиб қолган. Шу билан тўқнашув содир бўлган."