Onodera Group ўзбекистонликларни Японияда ишлашга тайёрлашга ёрдам беради
Япония корпорацияси ўзбекистонликларни Японияда ишлашга ўргатишда ва Тошкент вилоятида автодром ҳамда коллеж ташкил этишда иштирок этишни кўриб чиқмоқда.
Onodera Group ўзбекистонликларни Японияда ишлашга тайёрлашга ёрдам беради
Тошкент вилояти ҳокими Зойир Мирзаев Япониянинг Onodera Group корпорацияси вакиллари билан музокаралар ўтказди, унда Ўзбекистон фуқароларини Японияда ишлашга тайёрлаш ва уларни кейинчалик ишга жойлаштириш масалалари муҳокама қилинди.
Томонлар ҳайдовчиларни ўқитиш ва уларни тайёрлаш учун ихтисослаштирилган инфратузилмани яратишга алоҳида эътибор қаратдилар.
Таклиф этилаётган дастурга кўра, номзодлар Японияга ишга жўнаб кетишдан олдин касбий тайёргарликдан ўтадилар.
Тайёргарлик вақтида компания уларни бепул озиқ-овқат ва турар жой билан таъминлашни, шунингдек, визаларни расмийлаштириш, ишга жойлашишга кўмаклашиш ва Японияга етиб боргандан кейин уй-жой масалаларини ҳал қилишни ўз зиммасига олишни режалаштирмоқда.
Ҳамкорлик доирасида Тошкент вилоятига Япониянинг 17 та компанияси вакиллари келиши кутилмоқда. Уларнинг ўзбекистонликларни ишга жойлаштириш имкониятлари муҳокамасида иштирок этиши назарда тутилган.
Музокараларнинг асосий мавзуларидан бири ҳудудда махсус автодром ташкил этиш бўлди. Уни Япония йўл ҳаракати қоидаларининг хусусиятларига, жумладан, йўл белгилари ва транспорт воситаларини бошқариш талабларидаги фарқларга мослаштириш режалаштирилмоқда.
Onodera Group вакиллари ушбу лойиҳани амалга оширишда кўмаклашишни таклиф қилдилар.
Бундан ташқари, автодром ҳудудида ҳайдовчиларни тайёрлаш бўйича коллеж очиш имконияти муҳокама қилинди. Яна бир ташаббус Тошкент вилоятидан автобус ҳайдовчиларини Японияга 3 ойлик малака ошириш курсларига юборишни назарда тутади.
Таълим олиш ва Япония йўл ҳаракати қоидаларини ўргангандан сўнг, дастур иштирокчилари олинган билимларни Ўзбекистонда улашишлари мумкин бўлади, деб тахмин қилинмоқда.
Хусусан, улар маҳаллий ўқув юртларида дарс беришлари ва Японияда қўлланиладиган талабларни инобатга олган ҳолда янги ҳайдовчиларни тайёрлашлари мумкин бўлади.
Тақдим этилган режаларга кўра, янги ўқув маркази йилига 200 нафаргача одамни ўқитиши мумкин бўлади.
Учрашувда фуқароларни бошқа мутахассисликлар бўйича тайёрлаш, уларнинг касбий малакасини ошириш ва хорижий меҳнат бозорларида ишга жойлашишига кўмаклашиш масалалари ҳам кўриб чиқилди.