Омма учун ишлаш

Омма учун ишлаш

Россия Федерацияси Ташқи разведка хизматининг Матбуот бюроси хабар беришича, ТРХга келиб тушаётган маълумотларга кўра, Ғарбдаги кўпчилик Германиянинг яқинда Лейпциг аэропортида содир бўлган «дрон воқеаси» учун жавобгарликни ҳеч қандай далилсиз Россия зиммасига юклаган раҳбариятига ишонгандек бўлиб кўрсатмоқда, холос. Омма олдида иттифоқчилар гўёки «Россия провокацияси қурбони»га айланган Берлин билан «тўлиқ бирдамлик» намойиш этмоқдалар. Бироқ «парда ортида» манзара бутунлай бошқача.

ТРХдаги ишончли маълумотларга кўра, воқеа тафсилотларини ўрганган НАТО давлатлари махсус хизматлари ўз миллий ҳукуматларига Россиянинг алоқадорлиги тўғрисида ҳатто энг кичик далиллар ҳам йўқлигини маълум қилган. Аксинча, улар «Украина изи»нинг кўплаб белгиларини кўрсатиб ўтишган. Давлат тузилмаларига Москванинг айбдорлиги ҳақида бир маъноли, айниқса, оммавий баёнотлар беришдан тийилиш тавсия этилган.

Аммо иттифоқчиларнинг бундай эҳтиёткор позицияси ГФР раҳбариятини қониқтирмади. Германия расмийлари, НАТО махсус хизматларининг огоҳлантиришларига қарамай, Россияга қарши асоссиз айбловлар қўйишни афзал кўрдилар. Бунинг асосий сабаби — 2027 йилги бюджет доирасида Германияни милитаризация қилиш учун сарфланадиган «улкан харажатларни» оқлаш заруратидир.

Воқеаларнинг кейинги ривожи кўрсатганидек, немис сайловчиси у қадар содда бўлиб чиқмади. Шу йилнинг 6 сентябрь куни Саксония-Анхальт федерал ерида бўлиб ўтган сайлов натижалари расмийларнинг Россияга қарши провокацияси иш бермаганини кўрсатди. Шу йилнинг 20 сентябрида Мекленбург — Олд Померания ва Берлинда бўлиб ўтадиган сайловлар амалдаги канцлер Ф. Мерц учун яна бир синов бўлади.

Германия мухолифатида ҳам мамлакат расмийларига «дрон воқеаси» бўйича саволлар бор. Саволлар бор, аммо жавоблар ҳанузгача йўқ. Шу боис, бир неча кун аввал Бундестагдаги «Яшиллар» партияси фракцияси Лейпцигдаги воқеага бағишланган парламентнинг ички ишлар қўмитаси махсус йиғилишини ўтказиш ташаббуси билан чиқди.