Олмалиқда 15 миллион долларлик туристик "Экопарк" барпо этилади

Олмалиқда 15 миллион доллар эвазига «Экопарк» туристик боғи барпо этилади

Олмалиқ шаҳрининг «Камалак» маҳалласида қарийб 15 миллион долларлик тўғридан-тўғри хорижий инвестицияларни жалб қилган ҳолда «Экопарк» туристик боғини барпо этиш режалаштирилмоқда. Лойиҳани ишга тушириш бўйича келишувга шаҳар ҳокими Барҳаёт Мелиевнинг Хитойнинг Haocheng Industry Group компанияси вакиллари билан учрашувида эришилди.

Тақдим этилган концепцияга кўра, янги боғ катта кўкаламзорлаштирилган ҳудудда жойлашади. Бу ерда сунъий сув ҳавзалари ва каналлар, сайр зоналари, спорт ва рекреация майдончалари, шунингдек, автотураргоҳлар ва зарур инфратузилмани яратиш кўзда тутилган.

Лойиҳа Олмалиқ аҳолиси ва меҳмонлари учун замонавий ҳордиқ чиқариш масканига айланиши, шунингдек, шаҳарнинг яшил ҳудудларини сезиларли даражада кенгайтириши керак.

Хитойнинг Haocheng Industry Group компанияси EPC+F модели асосида энергетика ва инфратузилма объектларини молиялаштириш ва қуриш билан шуғулланади. Инвестор бунгача Австралия, Хитой ва Индонезияда лойиҳаларни амалга оширган.

Ўзбекистонда компания умумий қиймати 420 миллион доллардан ортиқ бўлган энергетика ва инфратузилма лойиҳаларини амалга оширишда иштирок этмоқда. Хусусан, Haocheng Industry Group Янги Тошкент ҳудудидаги ва Сирдарё ИЭСдаги ташаббусларга жалб этилган.