Олий ўқув yurtлари ва илмий ташкилотлар ҳузуридаги корхоналар қандай қўллаб-қувватланади
Илмий ишланмалар асосида маҳсулотлар чиқарадиган ва хизматлар кўрсатадиган «спин-офф» корхоналарини ташкил этиш ва қўллаб-қувватлаш тартиби тасдиқланди. Ишланмаларни тижоратлаштиришга тайёрлаш бўйича лойиҳалар танлов асосида молиялаштирилади.
Олий таълим муассасалари ва илмий ташкилотлар ҳузуридаги корхоналар қандай қўллаб-қувватланади
ВМҚнинг 554-сонли қарори билан илмий ишланмалар асосида маҳсулот ишлаб чиқарадиган ва хизматлар кўрсатадиган «спин-офф» корхоналарини ташкил этиш ва қўллаб-қувватлаш тартиби тасдиқланди. Ҳужжатда, шунингдек, ишланмаларни тижоратлаштиришга тайёрлаш бўйича лойиҳаларни танлов асосида молиялаштириш ҳам кўзда тутилган.
«Спин-офф» корхоналари тадқиқотлар натижаларини ишлаб чиқаришга жорий этиш учун олий таълим муассасалари ва илмий ташкилотлар ҳузурида ташкил этилади.
Корхонани Илмий-инновацион фаолиятни амалга оширувчи ташкилотлар реестрига киритиш учун ОТМ ёки илмий ташкилотнинг устав капиталидаги улуши камида 25 фоизни ташкил этиши керак. Бундан ташқари, асосланган бизнес-режа ҳамда чиқарилаётган маҳсулот ёки кўрсатилаётган хизматлар муассиснинг ишланмаларига асосланганлиги бўйича тасдиқ талаб қилинади. Устав капитали бюджетдан ташқари маблағлар, венчур фондлари, маҳаллий ва хорижий инвесторлар ҳамда бошқа рухсат этилган манбалар ҳисобидан шакллантирилиши мумкин.
Реестрга киритиш бўйича аризалар электрон платформа орқали топширилади. Олий таълим, фан ва инновациялар вазирлиги ҳузуридаги Инновацион ривожланиш агентлиги 10 иш куни ичида техник экспертиза ўтказади. Сўнг ариза махсус кенгаш томонидан кўриб чиқилади.
Реестрга киритилганлик ҳақидаги гувоҳнома ижобий қарор қабул қилинганидан кейин уч иш куни ичида берилади. Унинг амал қилиш муддати беш йилни ташкил этади.
Реестрга киритилган ва патентланган илмий ишланмалар асосида маҳсулот ишлаб чиқарадиган корхоналар ижтимоий солиқдан ташқари, қонунчиликда назарда тутилган имтиёз ва преференциялардан фойдаланишлари мумкин бўлади. Патентланмаган ишланмалар асосида товарлар ишлаб чиқарадиган ёки хизматлар кўрсатадиган корхоналар учун 2026 йил 1 майдан 2029 йил 1 майгача бўлган даврда фойда солиғи ставкасини 50 фоизга камайтириш назарда тутилган.
ОТМлар ва илмий ташкилотлар ўз шўъба корхоналарига биноларни тақдим этиши, ер участкаларини беш йилгача муддатга ижарага бериши, шунингдек, уч йил ичида қайтариш шарти билан ўзларининг бюджетдан ташқари маблағлари ҳисобидан молиявий ёрдам кўрсатиши мумкин бўлади.
5 йилни ташкил этувчи инвестиция даври мобайнида, ҳужжатда назарда тутилган ҳолатлардан ташқари, корхонадаги давлат улушини хусусийлаштиришга йўл қўйилмайди. Муддат тугагач, улушни бозор қийматида сотиб олиш бошқа иштирокчиларга таклиф этилади, улар рад этган тақдирда эса — очиқ аукционга қўйилади. ТУшган маблағлар муассиснинг инновацион фаолиятни қўллаб-қувватлаш жамғармасига йўналтирилади.
Олий таълим, фан ва инновациялар вазирлиги икки ой муддатда «спин-офф» корхоналари реестри юритилишини таъминлаши керак. Агентство, шунингдек, Фанни молиялаштириш ва инновацияларни қўллаб-қувватлаш жамғармаси маблағлари ҳисобидан илмий ишланмаларни тижоратлаштиришга тайёрлаш бўйича лойиҳаларни молиялаштиришга мунтазам равишда танловлар ўтказиб боради.