ОИИБ Ўзбекистондаги лойиҳаларни 5 миллиард долларгача молиялаштириши мумкин
Ўзбекистон ва Осиё инфратузилмавий инвестициялар банки 2026–2029 йилларга мўлжалланган янгиланган инвестиция дастурини имзолади. У мамлакатдаги инфратузилма лойиҳаларини 5 миллиард долларгача бўлган миқдорда молиялаштириш имкониятини назарда тутади. Бундан ташқари, банк электр тармоқларини модернизация қилишга тайёргарлик кўриш учун алоҳида грант ажратади.
ОИИБ Ўзбекистондаги лойиҳаларга 5 млрд долларгача маблағ ажратиши мумкин
Осиё инфратузилмавий инвестициялар банки (ОИИБ) 2026−2029 йилларга мўлжалланган янгиланган узоқ муддатли инвестиция дастурини имзолади, унда мамлакатдаги инфратузилма лойиҳаларини 5 миллиард долларгача бўлган миқдорда молиялаштириш имконияти кўзда тутилган. Бу ҳақда «Газета»га ОИИБдан маълум қилишди.
Ҳужжатлар 28 сентябрь куни Доҳа шаҳрида ОИИБнинг 11-йиллик йиғилиши доирасида имзоланди.
Банк томонидан келишувларни ОИИБнинг 2-минтақа давлат сектори бўйича инвестиция блоки, шунингдек, мижозларнинг лойиҳавий ва корпоратив молиялаштириш бўлими раҳбари Константин Лимитовский имзолади. Ўзбекистон томонидан эса — инвестициялар, саноат ва савдо вазири ўринбосари Шоҳруҳ Ғуломов имзо чекди.
Маросим инвестициялар, саноат ва савдо вазири, шунингдек, ОИИБда Ўзбекистон томонидан бошқарувчи бўлган Лазиз Қудратов иштирокида бўлиб ўтди.
Янгиланган кўп йиллик инвестиция дастури томонларнинг яқин йиллардаги ҳамкорлигининг устувор йўналишларини белгилаб беради. Унга банк томонидан 2026−2029 йилларда Ўзбекистонда умумий қиймати 5 миллиард долларгача молиялаштирилиши мумкин бўлган инфратузилма лойиҳалари киритилган.
«ОИИБнинг таъсисчи давлатларидан бири сифатида Ўзбекистон доимо кучли ва ишончли ҳамкор бўлиб келган, унинг инвестиция лойиҳалари рўйхати эса аниқ миллий устуворликларни акс эттиради. Янгиланган дастур 2029 йилгача бўлган ҳамкорлигимиз йўналишини белгилаб беради», — деди Константин Лимитовский.
Лазиз Қудратовнинг сўзларига кўра, Ўзбекистон ОИИБнинг минтақадаги энг йирик ҳамкори ҳисобланади.
«Янгиланган дастур билан биз ҳамкорлигимизни янада яқинроқ қилишга, кўпроқ хусусий инвесторларни жалб этишга ва биргаликда умумий режаларни аниқ лойиҳаларга тезроқ айлантиришга умид қиламиз», — деди вазир.
Бундан ташқари, томонлар ОИИБнинг Лойиҳаларни тайёрлаш махсус фондидан 1,5 миллион доллар миқдорида грант ажратиш тўғрисидаги битимни имзоладилар.
Маблағлар «Ўзбекистон электр узатиш тизимининг барқарорлигини ошириш» лойиҳасини тайёрлашга йўналтирилади. Улар техник тадқиқотлар ва бўлажак инвестиция лойиҳасининг асоси бўлиши керак бўлган бошқа дастлабки ишлар учун ишлатилади.
Унда электр тармоқларининг ўтказувчанлик қобилиятини ошириш, уларнинг ишончлилиги ва иқлим хавф-хатарларига чидамлилигини ошириш, шунингдек, қайта тикланувчи энергия манбалари объектларини улаш учун қўшимча имкониятлар яратиш кўзда тутилган.
Тайёргарлик босқичида техник ечимларни аниқлаштириш, зарур инвестициялар ҳажми ва иқлим хавф-хатарларини баҳолаш режалаштирилган.
Алоҳида эътибор электр тармоқларининг устувор участкаларига, жумладан, Сурхондарё ва Самарқанд вилоятлари ўртасидаги жанубий йўлакка, шунингдек, Фарғона водийсига қаратилади. Тармоқларнинг энг заиф участкаларини бартараф этиш ва қайта тикланувчи манбалардан олинадиган генерациянинг ўсиб бораётган ҳажмини улаш учун ечимларни аниқлаш кўзда тутилмоқда.
Ўзбекистон 2030 йилга бориб электр энергияси ишлаб чиқаришда қайта тикланувчи манбалар улушини тахминан 30 фоиздан 54 фоизгача оширишни режалаштирмоқда. Бунинг учун электр тармоқлари инфратузилмасини модернизация қилиш ва кенгайтириш талаб этилади.