«Ўзбекнефтгаз» М25 конидаги аварияни бартараф этиш қийматини очиқламади
«Ўзбекнефтгаз» шартноманинг махфийлигини важ қилиб, «Мустақилликнинг 25 йиллиги» газ конидаги ҳалокатни бартараф этиш қийматини ошкор қилмади.
«Ўзбекнефтгаз» М25 конидаги ҳалокат оқибатларини бартараф этиш қийматини очиқламади
«Ўзбекнефтгаз» АЖ «Мустақилликнинг 25 йиллиги» (М25) газ конидаги ҳалокат оқибатларини бартараф этиш ишлари қанчага тушишини очиқламади. Компанияда бу пудратчи билан имзоланган махфийлик тўғрисидаги келишув билан боғлиқлиги тушунтирилди. Шу билан бирга, ишлар бошлаб юборилган, зарур техника эса объектга етказиб берилган.
Бу ҳақда давлат компанияси вакиллари 27 октябрь куни тўққиз ойлик фаолият якунларига бағишланган матбуот анжуманида маълум қилди.
Журналистнинг шартнома нархи ҳақидаги саволига жавоб берар экан, «Ўзбекнефтгаз» вакили томонлар маълумотларни ошкор этмаслик тўғрисида келишув имзолаганини айтди.
«Шу асосда, ҳар қандай рақамни ошкор қилишдан олдин биз иккинчи томоннинг фикри ва розилигини олишимиз керак», — деди у.
Компанияда, шунингдек, ишлар қийматининг ошириб юборилгани бўлиши мумкинлиги ҳақидаги тахминлар рад этилди. «Ўзбекнефтгаз» вакилининг сўзларига кўра, пудратчини танлаш ва ҳамкорлик шартлари тўлиқ экспертизадан ўтказилгач ҳамда тегишли давлат идораларининг хулосалари олингач белгиланган.
Компания матбуот хизмати раҳбари Мўмин Ибодов потенциал пудратчилар билан ўтказилган барча музокараларда иштирок этганини маълум қилди.
Муҳокамалар давомида ишларнинг қиймати, муддатлари ва сифати кўриб чиқилди. Унинг сўзларига кўра, бошқарув раиси бир неча бор ошириб юборилган ёки талабларга жавоб бермайди деб ҳисоблаган таклифларга қарши чиққан. Якуний қарор ушбу масалалар кўриб чиқилгандан сўнг қабул қилинган.
«Бу ерда мақсад нархда эмас, балки ҳалокат оқибатларини имкон қадар тезроқ бартараф этишдадир», — деб таъкидлади матбуот хизмати раҳбари.
Журналист томонидан янграган маълумотларга кўра, 23 октябрь ҳолатига кўра, ҳалокат оқибатларини бартараф этиш масалалари Хитойнинг CNPC компанияси билан биргаликда муҳокама қилинган. Ишлар 2027 йилнинг биринчи ярмигача давом этиши кутилмоқда.
Бевосита ижрочи сифатида CNPC таркибига кирувчи CCDC чиқмоқда. Қарор қабул қилингунга қадар компания АҚШ, Хитой ва Россиядан келган пудратчилар билан музокаралар ўтказди. Улар ҳалокат оқибатларини бартараф этишнинг турли техник вариантларини таклиф қилишди.
Ечимни танлашда ишларни бажариш муддатлари, юзага келиши мумкин бўлган хавф-хатарлар, қиймати ва шунга ўхшаш ҳалокатлар оқибатларини, жумладан, қўшни ҳудудларда бартараф этиш тажрибаси ҳисобга олинган.
Шу билан бирга, шартноманинг аниқ суммаси ва молиявий шартлар тафсилотлари ҳамон ошкор қилинмаяпти.