Ўзбекистоннинг ёш архитекторлари Хитойда қурилиш технологияларини ўрганмоқда
Хитойдаги стажировка доирасида Ўзбекистоннинг ёш архитекторлари замонавий қурилиш материаллари, технологиялар ва шаҳарсозликка оид илғор ёндашувларни ўрганмоқдалар.
Ўзбекистоннинг ёш архитекторлари Хитойда қурилиш технологиялари билан танишмоқда
Ўзбекистон Республикаси Қурилиш ва уй-жой коммунал хўжалиги вазирлигининг ёш архитекторларидан иборат делегация Хитойда хорижий стажировкани ўтамоқда, унда замонавий қурилиш материаллари, технологиялар ва шаҳарсозликка оид илғор ёндашувларни ўрганмоқда.
Делегация ташриф буюрган илк объектлардан бири металл буюмлар ишлаб чиқаришга ихтисослашган Sichuan Wangang Metal Product заводи бўлди.
Делегация аъзоларига металл варақлардан ясалган йиғма қолиплаш (опалубка) тизимлари кўрсатилди, шунингдек, уларнинг турлари, техник имкониятлари ва қурилишда фойдаланишнинг афзалликлари ҳақида маълумот берилди.
Бундай тизимларни қўллаш қурилиш ишлари муддати ва харажатларини қисқартиришга, конструкциялар сифатини яхшилашга ва сейсмик хавфсизлик талабларига риоя қилишга ёрдам беради.
Кичик уланадиган элементлардан яхлит конструкцияларни йиғиш имконияти мураккаб шаклдаги бинолар ва баланд иншоотлар қурилишини енгиллаштиради. Бундан ташқари, қолиплардан кўп маротаба фойдаланиш қурилишнинг иқтисодий самарадорлигини оширади.
Ташриф давомида ёш архитекторлар хитойлик мутахассислар ва ишлаб чиқарувчилар билан фикр алмашиб, Ўзбекистонда кўп қаватли турар жой бинолари, ижтимоий инфратузилма объектлари ва баланд бинолар қурилишида ушбу технологияларни жорий этиш истиқболларини муҳокама қилдилар.
Синов майдончасида уларга қолипларни монтаж қилиш, бетон қуйиш, у қаттиқлашгандан сўнг конструкцияни демонтаж қилиш ва электр пайвандлаш ишларини бажариш намойиш этилди.
Бундан ташқари, Хитойда Сичуань архитектура технологиялари университети базасида ўзбек делегацияси учун ўқув дастурининг расмий очилиш маросими бўлиб ўтди. Тадбирда университет раҳбарияти ва ўқитувчилари, шунингдек, хусусий сектор вакиллари иштирок этди.
Иштирокчилар қурилиш соҳасини ривожлантириш учун халқаро тажриба алмашиш ҳамда замонавий билим ва технологияларни ўзлаштириш муҳимлигини таъкидладилар. Ислоҳотлар муваффақияти кўп жиҳатдан долзарб билим ва амалий кўникмаларга эга мутахассисларнинг малакасига боғлиқлиги алоҳида қайд этилди.
Дастур назарий машғулотлар ва илғор ечимларни амалий ўрганишни ўз ичига олади. Асосий йўналишлар қаторида — шаҳарсозликни рақамлаштириш, энергия самарадорлигини ошириш, энергияни тежаш, яшил ҳудудларни сақлаб қолиш ва шаҳар муҳитининг экологик барқарорлигини мустаҳкамлаш ўрин олган.
Делегация раҳбари, вазир маслаҳатчиси Умида Бойзоқова хитой томонига ўқишни ташкил этгани ва иштирокчилар учун яратилган шароитлар учун миннатдорчилик билдириб, ёш мутахассисларни янги билим ва тажриба олиш имкониятидан максимал даражада фойдаланишга чақирди.
Куннинг иккинчи ярмида делегация Сичуань архитектура технологиялари университетининг таълим муассасаси ташкил этилганининг 70 йиллигига бағишлаб очилган музейида бўлди.
Иштирокчилар университет тарихи, унинг ривожланиш босқичлари ҳамда таълим ва фан соҳасидаги ютуқлари билан танишдилар. шундан сўнг улар ўқув-амалий лабораториялари, замонавий асбоб-ускуналар ва талабалар олинган билимларни амалда қўллашлари учун яратилган шароитларни кўздан кечирдилар.
Стажировка ёш архитекторларга касбий дунёқарашини кенгайтиришга, халқаро тажрибани ўрганишга ва Ўзбекистоннинг қурилиш ҳамда шаҳарсозлик амалиётида қўлланилиши мумкин бўлган технологиялар билан танишишга ёрдам бериши кутилмоқда.