Ўзбекистоннинг йирик олий ўқув юртлари ва республика тиббиёт марказларига хусусий инвесторлар жалб этилади

Ўзбекистоннинг йирик олий ўқув юртлари ва республика тиббиёт марказларига хусусий инвесторлар жалб қилинади

Ўзбекистонда йирик олий таълим муассасалари ва республика ихтисослаштирилган тиббиёт марказларини босқичма-босқич тижоратлаштириш режалаштирилмоқда. Бу президентнинг 28 августдаги иқтисодиётда давлат иштирокини қисқартириш ва хусусийлаштиришни жадаллаштириш тўғрисидаги фармонида назарда тутилган.

Ҳужжатга кўра, улар хўжалик жамиятларига айлантирилади, уларнинг фаолиятига эса хусусий инвесторларни жалб қилиш кўзда тутилган.

Хусусий капитални жалб қилиш усулларидан бири бундай ташкилотлар устав капиталидаги акциялар пакетларини оммавий савдоларга чиқариш бўлади.

Шу билан бирга, ҳужжатда қайта ташкил этиладиган олий ўқув юртлари ва тиббиёт марказлари рўйхати келтирилмаган, инвесторларга таклиф қилиниши мумкин бўлган пакетлар ҳажми ва ушбу чорани амалга оширишнинг аниқ муддатлари кўрсатилмаган.

2025 йил сентябрь ойида президент бешта тиббиёт марказига (республика бўйича жами 24 та) хорижий профессионал менежерларни жалб қилиш ёки уларни хорижий клиникалар бошқарувига топшириш имкониятини ўрганишни топширган эди. Туркиялик мутахассислар фаолият юритаётган Республика онкология ва радиология марказидаги тажриба муваффақиятли мисол сифатида тилга олинган.

Тижорат фаолияти билан шуғулланувчи давлат муассасалари 2026 йил 1 декабрга қадар хўжалик жамиятларига айлантирилиши лозим. Фаолияти бошқарув, ижтимоий-маданий ёки бошқа нотижорат соҳага тегишли бўлган муассасалар бундан мустасно.

Бундан ташқари, давлат бюджетидан молиялаштириш манбасига эга бўлмаган давлат муассасаларини ташкил этиш тақиқланади. Ушбу норма мудофаа ва хавфсизлик билан боғлиқ муассасаларга, шунингдек, президент қарорларида алоҳида назарда тутилган ҳолларга татбиқ этилмайди.

Яна бир ўзгариш давлат иштирокидаги корхоналар тизимига кирувчи муассаса шаклидаги соҳавий бўлмаган ташкилотларга тегишли. Уларни бундай корхоналар таркибидан чиқариш, хўжалик жамиятларига айлантириш ва оммавий савдоларга чиқариш топширилди.

Ушбу чора-тадбирлар иқтисодиётда давлат иштирокини қисқартириш бўйича янги пакетга киради. Фармонда 84 та хўжалик жамиятидаги давлат улушларини, 1242 та кўчмас мулк объектини ва 8 минг гектарга яқин ер участкаларини сотиш назарда тутилган.

Бундан ташқари, давлат иштирокидаги 85 та корхонани тугатиш ва қайта ташкил этиш кўзда тутилган. Улар бўйича бошқарув органлари 1 ноябрга қадар тугатиш ёки қайта ташкил этиш тўғрисида қарор қабул қилишлари, жараёнларнинг ўзи эса — тўлов қобилиятсизлиги тўғрисидаги қонунчилик қўлланиладиган ҳоллардан ташқари — 2026 йил якунига қадар якунланиши лозим.