Ўзбекистоннинг 38 та олий ўқув юрти QS Asia 2027 рейтингидан ўрин олди

Ўзбекистоннинг 38 та олий ўқув юрти QS Asia 2027 рейтингига киритилди

Олий таълим соҳасидаги таҳлиллар билан шуғулланувчи QS Quacquarelli Symonds компанияси эълон қилди

Рейтингга Осиёнинг 26 та мамлакати ва ҳудудидан 1722 та университет кирди. Ўзбекистон унда 38 та олий ўқув юрти, жумладан 15 та янги иштирокчи билан тақдим этилган. Мамлакат кўрсаткичлари 17 фоизга ўсди.

Ўзбекистон олий ўқув юртлари орасида энг юқори ўринни эгаллаб келаётган Тошкент ирригация ва қишлоқ хўжалигини механизациялаш муҳандислари институти (ТИҚХММИ) ҳамон 113-ўринда бормоқда. Шу билан бирга, ўтган йилги рейтингга нисбатан олий ўқув юрти 10 поғона йўқотди.

Мирзо Улуғбек номидаги Ўзбекистон Миллий университети 196-ўринни эгаллади (2026 йилда 180-ўрин). Самарқанд давлат университети 92 поғонага кўтарилиб, 215-ўриндан жой олди.

Ўзбекистон олий ўқув юртлари орасида энг сезиларли ўсишни Наманган давлат техника университети кўрсатди ва у 245 поғонага кўтарилиб, 469-ўринни эгаллади.

QS Asia Rankings таълим муассасаларини 11 та мезон бўйича баҳолаш асосида тузилган. Кўрсаткичлар минтақа хусусиятларини ҳисобга олган ҳолда мослаштирилган, бу эса рейтингни глобал дунё университетлари рейтингидан (QS World University Rankings) фарқлайди.

QS тадқиқоти маълумотларига кўра, Ўзбекистон олий ўқув юртлари «Иш берувчилар ўртасидаги репутация», «Халқаро ўқитувчилар улуши» ва «Талабалар алмашинуви» каби мезонлар бўйича кучли натижаларга эга.

Илмий-тадқиқот маҳсулдорлиги Ўзбекистон университетлари учун асосий чорлов бўлиб қолмоқда: энг паст баҳолар «Битта нашрга иқтибослар сони» ва «Битта ўқитувчига тўғри келадиган нашрлар сони» мезонлари бўйича қайд этилган.

«Ўзбекистон — бу йилги рейтингнинг энг жадал ривожланаётган олий таълим тизимларидан бири. Шиддатли кенгайиш, ортиб бораётган халқаро ҳамкорликлар сони ва Самарқанд давлат университети каби университетларнинг рекорд даражадаги натижалари секторнинг жадаллашиб бораётганидан далолат беради. Кейинги илгарилаш мамлакатнинг ортиб бораётган миқёси ва халқаро амбицияларига мос келиши керак бўлган илмий-тадқиқот салоҳиятини оширишга боғлиқ бўлади», — деди QS ааввалги вице-президенти Бен Саутер.

Умумосиё рейтингида биринчи ўринни Гонконг университети сақлаб қолди. Иккинчи поғонада Пекин университети қолди. Учинчи ўринни тўққиз поғонага кўтарилган Цинхуа университети эгаллади.

Топ-20 таликка умуман олганда Гонконг, материк Хитойи, Сингапур, Жанубий Корея ва Малайзия университетлари кирган.

Марказий Осиё Ўзбекистон, Қозоғистон, Қирғизистон ва Тожикистондан 99 та университет билан тақдим этилган.