Ўзбекистонликлар Қозоғистонга сафар қилиш учун электрон рухсатнома расмийлаштиришига тўғри келади
Ўзбекистонликлар Қозоғистонга сафар қилиш учун электрон рухсатнома олишларига тўғри келади
Хорижликлар, жумладан Ўзбекистон фуқаролари Қозоғистонга кириш учун электрон рухсатнома олишлари талаб этилади. Қозоғистон ҳукумати уни расмийлаштириш тартибини тасдиқлади ва ҳужжат қийматини ноль сўм (бепул) қилиб белгилади. Аввалроқ мамлакат ИИВ бундай рухсатномаларни бериш учун тўлов ундиришни таклиф қилган эди.
Янги қоидалар 2026 йилнинг ноябрь ойидан бошлаб босқичма-босқич жорий этилади. Биринчи босқичда улар Оқтау халқаро аэропортида ва айрим автомобиль ўтказиш пунктларида ишлай бошлайди. 2027 йил 1 январдан тизим Остана ва Олмаота аэропортларига, 1 мартдан эса қолган ўтказиш пунктларига татбиқ этилади.
Дастлабки ойларда рухсатноманинг йўқлиги мамлакатга киришни рад этиш учун асос бўлмайди. Ўтказиш пунктлари ходимлари сайёҳларни ҳужжатни расмийлаштириш зарурлиги ҳақида огоҳлантирадилар. Бироқ 2027 йил 1 июлдан эътиборан унинг мавжудлиги мажбурий бўлади, рухсатноманинг йўқлиги эса чет элликка мамлакатга киришни рад этишга имкон беради.
Рақамли платформа орқали аризани режалаштирилаётган сафардан камида 72 соат олдин топшириш керак бўлади. Талаб Қозоғистон визасиз қатнов тўғрисида битим тузган мамлакатлар фуқароларига, шунингдек, Евроосиё иқтисодий иттифоқи давлатларига нисбатан татбиқ этилади.
Шу билан бирга, истиснолар назарда тутилган. Визасиз мамлакатларнинг 16 ёшдан кичик ва 65 ёшдан катта бўлган фуқароларига, халқаро юк автомобиллари ва автобус ҳайдовчиларига, ҳаво ва сув кемалари экипажи аъзоларига, поезд бригадаларига, шунингдек, дипломатлар ва расмий делегацияларнинг айрим тоифаларига рухсатнома талаб қилинмайди. Истиснолар хорижликларнинг бошқа бир қатор тоифалари учун ҳам назарда тутилган.
Аввалроқ Қозоғистон Ички ишлар вазирлиги "Очиқ НПА" порталида ETA'ни расмийлаштириш учун давлат божи ундиришни назарда тутувчи қонун лойиҳасини жамоатчилик муҳокамасига қўйган эди. Йиғилган маблағларни рақамли инфратузилмани сақлаш ва шахсий маълумотлар ҳимоясини кучайтиришга йўналтириш режалаштирилган эди.
Бироқ оммавий маслаҳатлашувлар ва идоралараро келишувлар якунларига кўра, сайёҳлар, ишбилармонлик сафарлари ва қўшни давлатлар ўртасидаги қариндошлик алоқалари учун қўшимча молиявий тўсиқлар яратмаслик мақсадида йиғимлардан воз кечишга қарор қилинди.