Ўзбекистонда уч давлат махсус кучлари жамланди: «Абадий биродарлик – В» машқлари ўтказилди
Ўзбекистонда Озарбойжон, Ўзбекистон ва Туркия махсус кучлари иштирокида «Абадий биродарлик – В» кўпмиллатли қўшма ўқув машғулотлари ўтказилди. Ҳарбийлар тоғли ҳудудлар ва аҳоли пунктларида жанговар ҳаракатлар олиб бориш, шартли душман ортига ўтиш ҳамда гаровдагиларни озод қилиш вазифаларини машқ қилди.
Ўзбекистонда уч давлатнинг махсус кучлари жамланди: «Абадий биродарлик – В» машқлари ўтказилди
Озарбойжон Мудофаа вазирлиги маълумотига кўра, машғулотлар минтақада хавфсизлик ва барқарорликни мустаҳкамлаш, шунингдек, ҳарбий ҳамкорликни ривожлантиришга қаратилди.
Асосий эътибор уч мамлакат махсус бўлинмалари ўртасида тажриба алмашиш, қўшма операцияларни режалаштириш ва ўтказишда ўзаро мувофиқлашган ҳаракатларни такомиллаштиришга қаратилди.
Машғулотлар режаси асосида иштирокчилар тоғли ҳудудлар ва аҳоли пунктларида жанг олиб бориш бўйича вазифаларни бажарди. Шунингдек, шартли душман ортига кириб бориш, разведка-қидирув ишларини амалга ошириш ва муҳим обьектларни эгаллаш ҳаракатлари машқ қилинди.
Терроризмга қарши операциялар доирасида гаровга олинганларни озод қилиш ҳамда стратегик обьектларни қўриқлаш бўйича ўқув вазифалари ҳам бажарилди. Ҳарбий хизматчилар кундузги ва тунги шароитда турли калибрдаги ўқотар қуроллар, снайперлик милтиқлари ҳамда махсус воситалардан ўқ отиш машқларини ўтказди.
Озарбойжон Мудофаа вазирлиги мамлакат ҳарбий хизматчилари машғулотларда юқори даражадаги жанговар тайёргарлик ва профессионал маҳоратни намойиш этганини қайд этди.
Машғулотларнинг якуний босқичини тадбир раҳбарияти билан бирга кузатган Озарбойжон Махсус операциялар кучлари қўмондони генерал-маёр Алакбар Жаҳонгиров озарбайжонлик махсус кучлар ҳарбий хизматчиларининг кўникмалари ва тайёргарлик даражасини юқори баҳолади.
Якунда белгиланган вазифаларни бажаришда алоҳида ўрнак кўрсатган бир гуруҳ ҳарбий хизматчилар тақдирланди. Иштирокчилар биргаликда эсдалик суратига тушди.