Ўзбекистонда Туркия модели асосида болалар реабилитация марказини ташкил этиш режалаштирилмоқда
Ўзбекистонда Туркиянинг Avrupa Medical Center намунаси асосида болалар реабилитация марказини ташкил этиш имконияти кўриб чиқилмоқда. Бу ғоя Миллий ижтимоий ҳимоя агентлиги вакиллари ва марказ мутахассисларининг Истанбулдаги учрашувида муҳокама қилинди.
Avrupa Medical Center 2010 йилдан буён фаолият юритиб келмоқда ва ногиронлиги ҳамда турли ривожланиш хусусиятларига эга, жумладан, аутизм спектри бузилиши, ҳаракат функциялари, нутқ ва когнитив ривожланиш бузилишлари бўлган болаларга ёрдам беради. Марказнинг Истанбулда 13 та филиали мавжуд.
Туркия моделига кўра, бирламчи текширувдан сўнг бола учун индивидуал реабилитация ва ўқитиш дастури тузилади. Бу жараёнда физиотерапевтлар, логопедлар, психологлар ва педагоглар иштирок этади, шунингдек, сенсор интеграция, нутқ ва жисмоний терапия қўлланилади. Томонлар Ўзбекистондаги бўлажак лойиҳанинг аниқ параметрларини кейинги музокаралар давомида белгилаб олишни режалаштирмоқда.
Бундан ташқари, бир ҳафта ичида Россия ва Қозоғистонда ота-она қарамоғисиз қолган 11 нафар вояга етмаган бола Ўзбекистонга қайтарилди.