Ўзбекистонда туғилишлар сони рекорддан кейин икки йил кетма-кет камайди
Ўзбекистонда 2023-йилда 962 мингта туғилиш қайд этилиб, 1991-йилдан буён энг юқори кўрсаткичга эришилган. Шундан кейин туғилишлар сони икки йил кетма-кет камайиб, 2025-йилда 879,6 мингтани ташкил этган. Бу 2023-йилга нисбатан 82,4 мингта ёки қарийб 8,6 фоиз кам.
Ўзбекистонда туғилишлар сони рекорд даражадан сўнг икки йил давомида кетма-кет пасайди. Миллий статистика қўмитаси маълумотларига кўра, 2024-йилда мамлакатда 926,4 мингта туғилиш қайд этилган. 2025-йилда бу рақам яна 46,8 мингтага, яъни қарийб 5,1 фоизга камайган.
Узоқ муддатли статистик маълумотлар туғилишлар сони аввал пасайиб, кейин яна ошганини кўрсатади. Хусусан, 1991-йилда 723,4 минг нафар бола туғилган бўлса, 2000-йилда бу кўрсаткич 527,6 минг нафарни ташкил этган. 2015-йилга келиб эса у 734,1 минг нафарга етган.