Ўзбекистонда тўққиз ойда 67,9 мингта хонадон фойдаланишга топширилди
2026 йилнинг январь–сентябрь ойларида уй-жойларни фойдаланишга топшириш 88,8% га ўсди. Ипотека кредитларини 67,6 минг нафар фуқаро 20,9 трлн. сўмга олди.
Ўзбекистонда тўққиз ойда 67,9 мингта хонадон фойдаланишга топширилди
2026 йилнинг январь–сентябрь ойларида Ўзбекистонда 67 859 та хонадон фойдаланишга топширилди, бу ўтган йилнинг шу давридаги кўрсаткичдан 88,8 фоизга кўпдир.
Тўққиз ой давомида 67 598 нафар фуқаро умумий суммаси 20,9 трлн сўм бўлган ипотека кредитларини олди.
Ушбу маълумотларни брифингда Иқтисодиёт ва молия вазирининг матбуот котиби, ахборот сиёсати масалалари бўйича маслаҳатчи Равшана Умарова маълум қилди.
Хисобот даврида «Янги Ўзбекистон» турар жой массивларида 13 408 та хонадон топширилди. Ушбу ҳудудларнинг муҳандислик-коммуникация инфратузилмасини ривожлантириш учун Давлат бюджетидан 677,1 млрд сўм ажратилди.
Умуман олганда, 2026 йилда республика бўйича 140 206 та хонадон қуриш режалаштирилган. 1 октябрь ҳолатига кўра, 67 859 та хонадон фойдаланишга топширилган. Реновация дастурлари доирасида қўшимча 10 045 та турар жой фойдаланишга топширилди.
Брифинг маълумотларига кўра, 1 октябрь ҳолатига кўра Ўзбекистон аҳолиси сони рўйхатга олиш натижаларини ҳисобга олган ҳолда 39,5 млн кишига етди. Урбанизация даражаси 54,5 фоизни, шаҳар аҳолиси эса 21,3 млн кишини ташкил этди. «Ўзбекистон — 2030» стратегиясида шаҳар аҳолиси улушини 60 фоизга етказиш мақсади қўйилган.
2021 йилдан бери мамлакатда «Янги Ўзбекистон» турар жой массивларини комплекс қуриш дастури амал қилмоқда, у нафақат уй-жой фондини, балки транспорт, муҳандислик ва ижтимоий инфратузилмани ҳам ривожлантиришни назарда тутади. 2022–2025 йилларда бундай массивларда 55 264 та хонадон қурилиб, фойдаланишга топширилди.
2026 йилга 61 та турар жой массивида яна 33 926 та хонадон қуриш режалаштирилган. 1 октябрга қадар 13 408 та хонадон топширилди, бу йиллик режанинг қарийб 40 фоизини ташкил этади.
2026 йилда ушбу массивларнинг муҳандислик-коммуникация инфратузилмасини ривожлантириш учун Давлат бюджетидан 1 трлн 152,3 млрд сўм назарда тутилган. 1 октябрга қадар 677,1 млрд сўм молиялаштирилди. Ушбу маблағлар йўллар қуриш, ичимлик суви таъминоти ва канализация, иссиқлик таъминоти ҳамда электр таъминоти тармоқларини ривожлантиришга йўналтирилди.
Ипотека бозорини ривожлантириш давлат уй-жой сиёсатининг алоҳида йўналиши бўлиб қолмоқда. 2026 йилга умумий суммаси 23 трлн сўм бўлган ипотека кредитлари ажратилиши назарда тутилган.
Ушбу суммадан 12,2 трлн сўми Давлат бюджети маблағлари, 7,8 трлн сўми тижорат банкларининг ўз маблағлари ва 3 трлн сўми «Ўзбекистон ипотекани қайта молиялаштириш компанияси» АЖ маблағлари ҳисобидан тушиши керак.
1 октябрь ҳолатига кўра, фуқароларга 20,9 трлн сўмлик ипотека кредитлари берилди, бу йиллик мақсадли кўрсаткичнинг 91 фоизини ташкил этади.
2025 йилнинг январь–сентябрь ойларига нисбатан кредитлаш ҳажми 39 фоизга ёки 5,9 трлн сўмга ортди.
Умумий суммадан 12,8 трлн сўми Давлат бюджети маблағларига, 6,1 трлн сўми тижорат банклари ресурсларига ва 2 трлн сўми ипотекани қайта молиялаштириш компанияси маблағларига тўғри келди.
Тўққиз ой давомида Давлат бюджетидан ипотека кредитлари бўйича субсидиялар учун 1 трлн 208,1 млрд сўм тўлаб берилди. шундан 407,8 млрд сўми 13 722 нафар фуқаро учун бошланғич бадалларни қоплашга, яна 800,3 млрд сўми фоиз тўловларини компенсация қилишга йўналтирилди.
Реновация доирасида 2026 йилда 30 мингта хонадон, 2027 йилда эса 35 мингта хонадон фойдаланишга топширилиши режалаштирилмоқда. Тегишли вазифалар Президентнинг 2026 йил 24 февралдаги ПФ-29-сон фармони билан мустаҳкамланган. Бундан ташқари, 2040 йилга бориб кўп хонадонли уй-жой қурилишининг умумий ҳажмида реновация доирасида қурилган хонадонлар улушини босқичма-босқич 60 фоизга етказиш режалаштирилмоқда.
Эскирган уй-жой фондини янгилашнинг ҳуқуқий асослари 2026 йил 10 июнда қабул қилинган «Шаҳарсозлик реновацияси тўғрисида»ги қонун билан мустаҳкамланди. Ҳужжат мулкдорлар ҳуқуқларини ҳимоя қилиш, ер ресурсларидан самарали фойдаланиш ва шаҳар қурилишини янгилаш лойиҳаларини молиялаштириш механизмларини назарда тутади.
«Ўзбекистон ипотекани қайта молиялаштириш компанияси» АЖ фаолияти доирасида тўққиз ойда фуқароларга илгари берилган 2 трлн 273,1 млрд сўмлик ипотека кредитлари қайта молиялаштирилди. Ушбу маблағлар 9 мингга яқин фуқарони қамраб олди.
Бундан ташқари, 1 594 та турар жойни экологик модернизация қилишга 221,2 млрд сўмлик ипотека кредитлари йўналтирилди.
Компания Европа тикланиш ва тараққиёт банкдан 685,6 млрд сўм ҳамда маҳаллий капитал бозоридан 1,3 трлн сўм жалб этди. 2030 йилга бориб унинг устав капиталини 5 трлн сўмгача, ипотека бозоридаги улушини эса 20 фоизгача ошириш режалаштирилмоқда.