Ўзбекистонда тарбиячи ёрдамчисига оид янги тартиб таклиф қилинмоқда
Ўзбекистонда мактабгача таълим ташкилотларидаги тарбиячи ёрдамчиси лавозимини педагогик фаолият билан боғлиқ лавозимлар рўйхатига киритиш таклиф этилмоқда. Тегишли қарор лойиҳасига кўра, бу тартиб хусусий мактабгача таълим ташкилотлари учун тавсиявий хусусиятга эга бўлади.
Ўзбекистонда тарбиячи ёрдамчиси бўйича янги тартиб таклиф этилмоқда
Мактабгача ва мактаб таълими вазирлиги ҳамда Олий таълим, фан ва инновациялар вазирлиги педагогик фаолият билан боғлиқ лавозимлар рўйхатига ўзгартириш ва қўшимчалар киритишни назарда тутувчи қарор лойиҳасини тайёрлади.
Ҳужжат «Педагогнинг мақоми тўғрисида»ги қонунга мувофиқ ишлаб чиқилган.
Лойиҳа орқали 2026-йил июн ойида тасдиқланган Педагогик фаолият билан боғлиқ лавозимлар рўйхатини кенгайтириш таклиф қилинмоқда.
Хусусан, рўйхатга «Мактабгача таълим ташкилотида тарбиячи ёрдамчиси» лавозимини киритиш назарда тутилган.
Шу билан бирга, ҳужжатда ушбу лавозимнинг хусусий мактабгача таълим ташкилотлари учун тавсиявий хусусиятга эга бўлиши белгиланган.
Бундан ташқари, рўйхатнинг 30-позициясини янги таҳрирда баён этиш таклиф қилинган. Унга кўра, мазкур позицияда «Ҳуқуқшунослик бўйича профессор-ўқитувчи» лавозими кўрсатилади.
Қарор лойиҳаси Президент ҳузуридаги Ижтимоий ҳимоя миллий агентлиги, Камбағалликни қисқартириш ва бандлик вазирлиги, Спорт вазирлиги, Маданият вазирлиги, Президент ҳузуридаги Тадбиркорлик субьектларининг ҳуқуқлари ва қонуний манфаатларини ҳимоя қилиш бўйича вакил ҳамда Савдо-саноат палатаси билан келишилган.
Лойиҳага кўра, қарор қабул қилинса, у расмий эълон қилинган кундан эътиборан кучга киради.