Ўзбекистонда сув омборларида туризмни ривожлантириш ва хавфсизлик талабларини кучайтириш назарда тутилмоқда
Ўзбекистонда сув омборларида туризмни ривожлантириш ва хавфсизлик талабларини кучайтириш мўлжалланмоқда
Ўзбекистон Президенти Шавкат Мирзиёев сув омборларида туристик хизматларни ривожлантириш, дам олувчилар хавфсизлигини ошириш ва гидротехника объектларининг ишончли эксплуатациясини таъминлаш бўйича таклифлар билан танишди.
Ҳозирги вақтда мамлакатимизнинг 5 та сув омборида туристик фаолият ташкил этилган бўлиб, яна 25 та объектда шундай хизматларни йўлга қўйиш салоҳияти мавжуд. Бу қўшимча инвестицияларни жалб қилиш, иш ўринлари яратиш ва сайёҳлар оқимини ошириш имконини беради.
Сув ҳавзалари яқинида фаолият юритаётган тадбиркорларни қўллаб-қувватлаш учун 2029 йил 1 октябргача ер ва мол-мулк солиғи ставкаларини 2 бараварга камайтириш таклиф этилди. Бундан ташқари, GPS ускуналари, қутқарув ва ҳимоя воситалари олиб кирилганда божхона тўловларини тўлашни 120 кунга узайтириш ёки бўлиб-бўлиб тўлаш имкониятини бериш режалаштирилмоқда. Ушбу ҳудудлардаги ер участкаларини сотишдан тушган маблағларни ташқи муҳандислик тармоқлари ва йўл инфратузилмасини ривожлантиришга йўналтириш таклиф қилинмоқда.
Параллель равишда сувдаги хавфсизлик талабларини кучайтириш режалаштирилмоқда. Бунинг учун туристик хизматларни сертификатлашни жорий этиш ва бизнесни соҳавий қутқарув хизматлари билан шартномалар тузишга мажбурлаш таклиф этилмоқда. Хавфларни камайтириш ва тезкор ёрдам кўрсатишни таъминлаш учун сув ҳавзалари яқинидаги дам олиш зоналарини қутқарув қайиқлари, кузатув миноралари ва чуқурлик кўрсаткичлари билан жиҳозлаш мўлжалланмоқда. Республикадаги фаолият юритаётган 56 та сув омборидан фақат 4 та объектда қутқарув хизматлари ташкил этилгани сабабли, "Қарқидон" сув омбори мисолида профессионал бўлинмаларни ташкил этиш таклиф қилинди.
Тақдимотда гидротехника иншоотларининг техник ҳолати ҳам кўриб чиқилди, улардан 25 таси мутахассислар томонидан жойига чиққан ҳолда текширилган. Хавфли ўзгаришларни ўз вақтида аниқлаш учун маҳаллий огоҳлантириш тизимлари, видеокузатув, сейсмологик ускуналар ва рақамли мониторинг воситаларини қўллашни кенгайтириш режалаштирилмоқда. Муҳокама якунлари бўйича давлат раҳбари мутасадди идораларга сув омборларида профессионал қутқарув бўлинмалари ишини йўлга қўйиш ва туристик объектлар учун аниқ хавфсизлик талабларини тасдиқлашни топширди.