Ўзбекистонда педагоглар болаларга нисбатан зўравонлик қилгани учун жаримага тортилади ва ишдан четлаштирилади
Ўзбекистонда педагоглар болаларга нисбатан зўравонлик қилгани учун жаримага тортилади ва ишдан четлаштирилади
Ўзбекистонда педагоглар ва тарбиячилар томонидан болаларга нисбатан жисмоний ва руҳий зўравонлик ишлатганлик учун жавобгарлик кучайтирилди. Болаларни камситганлик, ҳақорат қилганлик ва уларга нисбатан куч ишлатганлик учун эндиликда жарима кўзда тутилган, жавобгарликка тортилган педагоглар эса бир йил муддатга болалар билан ишлашдан четлаштирилади.
Маъмурий жавобгарлик тўғрисидаги кодексга киритилган қўшимчаларга кўра, тарбиялаш ёки ўқитиш жараёнида вояга етмаган шахсга нисбатан жисмоний зўравонлик ишлатганлик, шунингдек, уни камситиш ва ҳақорат қилишни ўз ичига олган таҳқирлаганлик учун БҲМнинг 1 бараваридан 5 бараваригача — 440 минг сўмдан 2,2 миллион сўмгача жарима кўзда тутилган. Бу ҳаракатларда жиноят таркиби бўлмаган ҳолатларга тегишлидир.
Шу билан бирга, жазо фақат жарима билан чекланиб қолмайди. Болаларга нисбатан жисмоний ёки руҳий зўравонлик қилгани учун маъмурий жавобгарликка тортилган педагоглар бир йил давомида педагогик фаолият билан шуғулланишга қўйилмайди.
Тақиқ болалар боғчалари, мактаблар, коллежлар, техникумлар ва қўшимча таълим муассасаларида ишлашга тааллуқлидир.
Қонун алимент масалаларига ҳам дахл қилди. Бола тўлиқ давлат таъминотидаги муассасада бўлса ҳам, ота-оналар алимент тўлашдан озод этилмайди, алимент миқдорини камайтириш тўғрисидаги ишлар эса «Инсон» марказлари иштирокида кўриб чиқилади.