Ўзбекистонда ов қилиш гувоҳномалари рақамли форматга ўтказилади

Ўзбекистонда ов қилиш гувоҳномалари рақамли форматга ўтказилади

Ўзбекистонда ов қилиш ва ов қилиш гувоҳномаларини бериш тартиби ўзгартирилади. Ҳужжатнинг ўзи рақамли форматга ўтказилади, ов хўжаликлари учун эса етиштирилган ва табиатга қўйиб юборилган ёввойи ҳайвонларни овлашнинг янги қоидалари жорий этилади.

Янги қонунга кўра, гувоҳномани овчилар учун махсус ўқув курсларини тамомлаган ва тест синовларидан муваффақиятли ўтган 18 ёшдан ошган муомалага лаёқатли фуқаролар олишлари мумкин бўлади. Ҳужжатни расмийлаштириш Ягона интерактив давлат хизматлари портали — my.gov.uz орқали амалга оширилади.

Экология ва иқлим ўзгариши миллий қўмитаси гувоҳномани икки йил муддатга беради. Уни узайтириш эгасининг аризасига кўра амалга оширилиши мумкин бўлади.

Ов қилишнинг ўзи фақат ов хўжаликларига бириктирилган ҳудудларда, шунингдек, эркин ов қилиш жойларида рухсат этилади. Уларнинг рўйхатини Экология ва иқлим ўзгариши миллий қўмитаси белгилайди.

Питомникларда ёввойи ҳайвонларни мустақил равишда етиштирадиган хўжаликлар учун алоҳида тартиб назарда тутилган. Агар улар томонидан қўйиб юборилган ҳайвонлар бириктирилган ов жойларида мослашиб кетса, хўжалик кўпайиш давридан ташқари, йил давомида уларни овлашни ташкил этиши мумкин бўлади.

Овланган ҳайвонлар сони қўйиб юборилганлар сонидан кўп бўлмаслиги керак. Бунда уларни тутиш учун алоҳида рухсатнома талаб этилмайди.

Кўпайиш даври Ўзбекистон Фанлар академияси Зоология институтининг хулосаси асосида белгиланади.

Бундан аввал Ўзбекистонда камёб ва йўқолиб кетиш хавфи остида турган ёввойи ҳайвонлар турларини овлашга тақиқ жорий этилиши ҳақида хабар берилган эди.