Ўзбекистонда мактаб директорларини вазирлик билан келишилмаган ҳолда йиғилишларга чақириш тақиқланади

Ўзбекистонда мактаб директорларини вазирлик билан келишмасдан йиғилишларга чақириш тақиқланади

Ўзбекистон Бош вазирининг биринчи ўринбосари — таълим ва фан вазири Эркинжон Турдимов мактаб директорларини вазирлик билан келишмасдан йиғилишларга чақириш тақиқланганини маълум қилди.

«Мактаб директорларини йиғилишларга, жумладан ҳокимликларга чақириш қатъиян ман этилади. Ҳар қандай йиғилишда иштирок этиш фақат вазирлик билан келишилган ҳолда мумкин. Шундан кейингина директор йиғилишга бориши мумкин», — деди Турдимов.

Вазирнинг сўзларига кўра, таълим муассасалари раҳбарлари кўплаб мажлисларга вақт сарфламасдан, ўзларининг бевосита вазифалари билан шуғулланишлари керак.

«Мактаб таълим билан, боғча болалар тарбияси билан шуғулланиши керак. Улар йиғилишларга бормаслиги лозим. Агар кимнидир йиғилишга таклиф қилиш керак бўлса, хўжалик ишлари бўйича мудир (завхоз) бор-ку. Умуман, мактаб директорини ҳокимликка чақиришдан нима наф?» — деди у.

Мисол тариқасида Турдимов ҳокимликдаги фаолиятидан бир ҳолатни келтириб ўтди. Унинг сўзларига кўра, у таълим муассасалари раҳбарларидан бирига йиғилишларга қатнашишни бир неча бор тақиқлаган, аммо у бошқа мансабдор шахсларнинг топшириқларини важ қилиб, барибир келишда давом этган.

«Мен унга: „Йиғилишга борсанг, оёғингни синдираман“… дегандим. У эса барибир келаверарди. „Нимага келдинг?“ деб сўрасам, „Келишни айтишди“… дейди. Мен унга: „Менинг гапим сен учун дорими? Унда телефонингни чиқар, диктофонни ёқ ва ёзиб ол. Мен сенга ҳаммасини батафсил тушунтириб бераман“, деганман», — деб сўзлаб берди вазир.

У ушбу тақиқ мактаб раҳбарларини мажлисларга ким таклиф қилишидан қатъи назар, бажарилиши шартлигини таъкидлади.

Йиғилишда Эркинжон Турдимов, шунингдек, таълим соҳасида, хусусан, олий ва мактабгача таълим соҳасида иккита йирик лойиҳани амалга ошириш режалари ҳақида гапириб ўтди.

Учрашув давомида вазир хусусий таълим соҳасида фаолият юритаётган тадбиркорларнинг таклифларини тинглади ҳамда нодавлат мактаблар ва боғчаларни лицензиялаш тартибини қайта кўриб чиқиш тарафдори эканини билдирди.

Унинг фикрича, агар объект ваколатли органлар томонидан текширилиб, зарур рухсатномаларни олган бўлса, Таълим ва фан вазирлигидан алоҳида лицензия олиш зарурати саволлар туғдиради.

«Агар санитария-эпидемиология хизмати, қурилиш, ёнғин хавфсизлиги ва бошқа тегишли органлар ҳаммасини текшириб, рухсатнома берган бўлса, вазирлик қайси асосга кўра лицензия беради? У айнан нимани текширади? Умуман олганда, хусусий боғча ва мактабларни очишда вазирлик томонидан лицензиялашни бекор қилиш керак», — деди Турдимов.

Турдимов, шунингдек, хусусий таълим муассасаларининг муаммолари ҳал этилишини таъминламаган мансабдор шахсларни танқид қилди. У ўз вазифаларини бажармаётган вазирлик ходимлари лавозимидан озод этилиши мумкинлигидан огоҳлантирди.

Йиғилишда Самарқанд вилояти қурилиш бошқармасининг фаолияти алоҳида танқидга учради. Кейинчалик идора раҳбари ҳудудда қурилиш ҳужжатлари билан боғлиқ 522 та муаммоли масала мавжудлигини, улардан бештаси хусусий таълим муассасаларига тегишли эканини аниқлаштирди.

Бундан ташқари, вазир таълим ташкилотларининг мурожаатларини қабул қилиш учун алоҳида электрон платформани ишга тушириш режалари ҳақида маълум қилди.

Унинг сўзларига кўра, зарур шароитлар яратиб бўлинган, асосий вазифа эса интизомни йўлга қўйиш ва талабчанликни оширишдан иборат.