Ўзбекистонда Конституциявий суд судьяларининг 10 йиллик ваколат муддати мустаҳкамлаб қўйилди

Ўзбекистонда Конституциявий суд судьяларининг 10 йиллик ваколат муддати белгиланди

Ўзбекистонда янги «Ўзбекистон Республикасининг Конституциявий суди тўғрисида»ги конституциявий қонун қабул қилинди. Ҳужжатда суднинг ваколатлари, судьяларни сайлаш ва унинг қарорлари кучга кириш тартиби белгиланган. № ЎРҚ-1181-сонли Қонун 2026 йил 14 октябрда қабул қилинган.

Қонунга кўра, Конституциявий суд қонунлар, Олий Мажлис палаталарининг қарорлари, Президентнинг фармон ва қарорлари, ҳукумат ва маҳаллий ҳокимият органларининг қарорлари Конституцияга мувофиқлигини текширади. Бундан ташқари, суд Қорақалпоғистон қонунлари Ўзбекистон қонунчилигига мувофиқлигини аниқлайди.

Шунингдек, Конституциявий суд Олий суднинг норматив-ҳуқуқий ҳужжатларнинг конституциявийлигини текшириш тўғрисидаги мурожаатларини кўриб чиқади. Ўз ваколатлари доирасида у Конституция ва қонунларни шарҳлайди.

Конституциявий суд таркибига тўққиз нафар судья, жумладан, раис ва унинг ўринбосари киради. Ҳар бир судья алоҳида-алоҳида ўн йил муддатга сайланади.

Конституциявий суднинг қарорлари ва хулосалари расмий эълон қилинган кундан эътиборан кучга киради. Қонуннинг ўзи ҳам расмий эълон қилинган кундан эътиборан кучга киради, бироқ алоҳида қоидалар 2028 йил 1 январдан кучга киради.