Ўзбекистонда грипп ва ЎРВИ билан касалланишнинг мавсумий ортишига тайёргарлик кўрилмоқда
Ўзбекистонда грипп ва ЎРВИ билан касалланишнинг мавсумий ортишига тайёргарлик кўрилмоқда
Ўзбекистонда одатда ноябрь–февраль ойларига тўғри келадиган грипп ва ўткир респиратор вирусли инфекциялар (ЎРВИ) билан касалланиш ҳолатларининг мавсумий ортиши кутилмоқда. Соғлиқни сақлаш вазирлиги маълумотларига кўра, ҳозирда эпидемиологик вазият барқарорлигича қолмоқда, тиббиёт муассасалари эса куз-қиш даврига тайёргарлик кўрмоқда.
Бу ҳақда 15 октябрь куни ССВ матбуот хизмати томонидан ташкил этилган брифингда Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабеков маълум қилди.
Унинг сўзларига кўра, 2026 йилнинг тўққиз ойи давомида грипп ва ЎРВИ билан касалланиш ўтган йилнинг шу даврига нисбатан камайган. Шу билан бирга, қайд этилган ҳолатларнинг салмоқли қисми Тошкент шаҳрига тўғри келмоқда.
Отабеков юқори хавф гуруҳига олти ёшгача бўлган болалар ва 65 ёшдан ошган кишилар киришини эслатиб ўтди. Инкубация даври бир кундан тўрт кунгача давом этиши мумкин. Одатда касаллик ҳароратнинг кескин кўтарилиши, йўтал, мушаклар, томоқ ва бўғимлардаги оғриқлар билан бошланади.
Қатор ҳолатларда грипп асоратларни, жумладан, пневмония, синусит ва отитни келтириб чиқаради. Болаларда, шунингдек, нафас олишнинг қийинлашиши, сувсизланиш, иштаҳа йўқолиши ва диарея кузатилиши мумкин.
Қўмита вакилининг сўзларига кўра, куз-қиш мавсумига шифохоналар ва оилавий поликлиникалар тайёрлаб қўйилган: зарур дори-дармонлар, кислород ва тиббий ускуналар захираси яратилган, шунингдек, шошилинч ёрдам кўрсатиш чоралари кўрилган. Қўмита эпидемиологик вазиятни назорат қилишда давом этмоқда.
Устувор вазифалар қаторида Отабеков касалланганларни ўз вақтида аниқлаш, зарурат туғилганда пациентларни стационарларга тезкорлик билан юбориш ва уйда даволанаётганларни назорат қилишни айтиб ўтди. Бундан ташқари, жамоат жойларида, транспортда ва иш жойларида санитария-гигиена қоидаларига риоя қилиниши устидан назоратни кучайтириш режалаштирилмоқда.
Аввалроқ Соғлиқни сақлаш вазирлиги ота-оналарга болаларда ЎРВИ ва гриппнинг олдини олиш чораларига риоя қилишни: уларни қўл ювишга ўргатиш, касалланганлар билан мулоқотда бўлишдан сақланиш ва илк симптомлар пайдо бўлганда уйда қолдиришни тавсия қилган эди.