Ўзбекистонда алиментларни иш ҳақига боғламаслик ҳамда боланинг ёши ва эҳтиёжларини ҳисобга олиш таклиф этилмоқда

Ўзбекистонда алиментларни ҳисоблаш тартибини қайта кўриб чиқиш, уларни иш ҳақига боғламаслик ҳамда боланинг ёши ва эҳтиёжларини ҳисобга олиш таклиф этилмоқда

Ўзбекистонда алимент миқдорини белгилаш тамойилини ўзгартириш хоҳланмоқда. Ота-онанинг расмий даромадига таяниш ўрнига, боланинг ёши ва уни таъминлаш учун зарур бўлган харажатларни ҳисобга олиш таклиф қилинмоқда.

Бу ҳақда Сенатдаги муҳокамада Бош вазир ўринбосари — Оила ва хотин-қизлар қўмитаси раиси Дилноза Каттахонова маълум қилди.

Унинг сўзларига кўра, бугунги кунда айрим ота-оналар алимент миқдорини камайтириш учун ҳақиқий даромадларини атайлаб яширадилар ёки расман кам маош тўланадиган ишга жойлашадилар. Шу сабабли бола ҳатто кундалик эҳтиёжларига ҳам етмайдиган суммани олиши мумкин.

Ушбу муаммони ҳал қилиш учун болалар учун ёш тоифасини ҳисобга олган ҳолда минимал истеъмол саватчасини белгилаш таклиф этилмоқда. Бунда алиментнинг минимал миқдорини ана шундай саватча қийматидан келиб чиқиб ҳисоблаш режалаштирилмоқда.

Ҳозирда алимент миқдори ота-онанинг даромадига боғлиқ. Бир бола учун даромаднинг чорак қисми, икки бола учун учдан бир қисми, уч ва ундан ортиқ бола учун эса ярми ундирилади.

Бунда ҳар бир бола учун тўлов меҳнатга ҳақ тўлашнинг энг кам миқдорининг 26,5 фоизидан кам бўлиши мумкин эмас — ҳозирда бу 360,4 минг сўмни ташкил этади.

Шу тариқа, таклиф этилаётган ёндашувда алимент миқдори нафақат ота-онанинг расмий иш ҳақи, балки биринчи навбатда болани таъминлаш учун зарур бўлган харажатлар билан белгиланади.

Шунингдек, алимент ундириш механизмининг ўзини ҳам ўзгартириш таклиф этилмоқда. Каттахонованинг сўзларига кўра, халқаро тажрибани ҳисобга олган ҳолда, тартиб-таомилларнинг бир қисмини босқичма-босқич хусусий секторга ўтказиш режалаштирилмоқда. Ҳозирда алимент ундириш билан асосан Мажбурий ижро бюроси шуғулланади.

Аввалроқ Навоий вилоятининг Кармана туманида Мажбурий ижро бюроси ходимлари алимент тўлашдан қочиб, тўғридан-тўғри тандир ичига яширинган эркакни топишган эди.