Ўзбекистонда 300 дан ортиқ киши бепул таксоматлар орқали ОИВга тест топширди
Ўзбекистонда 300 дан ортиқ киши бепул таксоматлар орқали ОИВга мустақил тестдан ўтиб бўлди. Текширувни бепул ва тиббиёт ходими иштирокисиз амалга ошириш мумкин. Сўлак бўйича таҳлил натижаси 20–40 дақиқадан сўнг маълум бўлади.
Бундай қурилмаларни жойлаштириш президент қарорида назарда тутилган. Лойиҳа ОИВни барвақт аниқлашни, жумладан меҳнат мигрантлари орасида соддалаштиришга қаратилган.
Таксоматлар одамлар гавжум жойларда — аэропортларда, вокзалларда ва жамоат жойларида ўрнатилмоқда. Ҳозирда улар Ислом Каримов номидаги Тошкент халқаро аэропортида, Республика ОИТСга қарши кураш маркази биносида, шунингдек, Андижон, Наманган, Сурхондарё, Бухоро, Қашқадарё, Навоий, Хоразм, Самарқанд, Фарғона, Қорақалпоғистон аэропортларида ва Жиззах вилоятидаги "Зомин" санаториясида ишламоқда.
Қурилмадан фойдаланиш учун шахсни тасдиқловчи ҳужжатни сканерлаш, тест тўпламини олиш ва мустақил равишда текширувдан ўтиш керак. Фойдаланувчининг маълумотлари электрон тизимга киритилади — бу қайта алоқа, натижалар бўйича маслаҳат ва тиббий мутахассисларга юбориш учун зарур.
Тестлаш сўлак намунаси бўйича, қон олишсиз ва бошқа инвазив процедураларсиз ўтказилади. Бунинг учун махсус лаборатория ускуналари талаб қилинмайди.
Агар тест мусбат натижа берса, бу ҳали одамда ОИВ борлигини англатмайди. Тасдиқлаш учун ҳудудий ОИТСга қарши кураш марказида лаборатория текширувидан ўтиш зарур. Агар ташхис тасдиқланса, пациентга бепул тиббий кузатув ва даволаниш таъминланади.
2026 йил охиригача бундай қурилмаларни Ўзбекистоннинг барча ҳудудларида ўрнатиш режалаштирилган.
Аввалроқ Ўзбекистон сенаторлари қонун лойиҳасини маъқуллаган эди, унга кўра хорижда уч ойдан ортиқ бўлган 18 ёшдан 60 ёшгача бўлган фуқаролар ОИВга мажбурий текширувдан ўтишлари керак. Шунингдек, ОИВ/ОИТС ва туберкулёз билан касалланган одамларни ишга жойлаштиришни чеклаш таклиф қилинган эди.