Ўзбекистонда 2027 йил 1 июлдан ўсимлик ёғини мажбурий маркировкалашни жорий этиш таклиф қилинди
Таклиф этилаётган тартибга кўра, ишлаб чиқарилаётган ва импорт қилинаётган ўсимлик ёғи ўровига махсус рақамли код туширилади. Маркировкасиз маҳсулот сотувчиларига нисбатан қонунчиликда назарда тутилган чоралар қўлланилиши мумкин.
Ўзбекистонда 2027 йил 1 июлдан ўсимлик ёғини мажбурий маркалашни жорий этиш таклиф қилинди
Ўзбекистонда 2027 йил 1 июлдан бошлаб ўсимлик ёғини мажбурий рақамли маркалаш тизимини жорий этиш режалаштирилмоқда. Бу ҳақда Солиқ қўмитаси жамоатчилик муҳокамасига қўйган Вазирлар Маҳкамаси қарори лойиҳасида айтилади.
Ҳужжат норматив-ҳуқуқий ҳужжатлар лойиҳаларини муҳокама қилиш порталига 9 октябрь куни жойлаштирилган. Муҳокама 24 октябргача давом этади.
Лойиҳага кўра, ўсимлик ёғини ишлаб чиқариш, импорт қилиш, улгуржи ва чакана сотиш билан шуғулланувчи компаниялар «Асл белгиси» миллий ахборот тизимига уланиши керак бўлади. Улар ушбу тизим орқали маркаланган маҳсулотни муомалага киритиш, уни савдо жараёнида ҳаракатлантириш ва муомаладан чиқариш тўғрисидаги маълумотларни узатишга мажбурдирлар.
Ўсимлик ёғи ўрамига GS1 DataMatrix форматидаги махсус икки ўлчамли кодни тушириш таклиф этилмоқда. Уни бевосита ўрамнинг ўзига чоп этиш ёки қайта фойдаланиш мумкин бўлмаган махсус ёрлиқ ёрдамида ёпиштириш мумкин бўлади.
Бунда рақамли код истеъмолчи учун кўринадиган жойда жойлашиши ва ўрамни очмасдан сканерлаш учун очиқ бўлиши керак. У ўрамнинг ўлчами камида 10х10 миллиметр бўлган махсус контраст жойига туширилади. Қарор лойиҳасида мажбурий маркаланиши керак бўлган ўсимлик ёғини маркасиз сотиш савдо қоидаларини бузиш ҳисобланиши кўрсатилган. Бундай ҳолларда қонунчиликка мувофиқ чоралар кўрилади.
Шунингдек, «Асл белгиси» тизими оператори — «CRPT Turon» МЧЖ Солиқ қўмитаси билан биргаликда 2027 йил 1 январгача рўйхатдан ўтган ва тегишли шартномани имзолаган ишлаб чиқарувчилар ҳамда импорт қилувчиларни маркалаш кодларига буюртма беришни бошқариш ускуналари билан таъминлаши назарда тутилган.
Ҳужжатда янги тартибнинг асосий мақсадлари сифатида ўсимлик ёғини ноқонуний олиб кириш, ишлаб чиқариш ва сотиш ҳолатларининг олдини олиш, шунингдек, маҳсулот муомаласини рақамлаштириш қайд этилган. Ҳозирча ушбу тартиб тасдиқланмаган, лойиҳа жамоатчилик муҳокамаси босқичида турибди.