Ўзбекистон Президенти Сербияга қўшма лойиҳалар учун бешта йўналишни таклиф қилди
Президент Шавкат Мирзиёев Сербия компанияларини Ўзбекистонда савдо-сотиқдан ишлаб чиқаришни маҳаллийлаштириш ва технологиялар трансферига ўтишга чақирди. У устувор йўналишлар сифатида автокомпонентлар, электротехника, дори-дармонлар, тўқимачилик, агролойиҳалар ва IT соҳаларини тилга олди. Бир қатор йўналишларда Сербия компаниялари билан музокаралар аллақачон олиб борилмоқда.
Ўзбекистон Президенти Сербия учун қўшма лойиҳаларнинг бешта йўналишини белгилаб берди
8 сентябрь куни Белградда бўлиб ўтган Ўзбекистон-Сербия бизнес-форумида Ўзбекистон Президенти Шавкат Мирзиёев иқтисодий ҳамкорликни кенгайтириш учун бешта асосий соҳани санаб ўтди: машинасозлик ва электротехника, фармацевтика, енгил саноат, қишлоқ хўжалиги ва рақамли иқтисодиёт.
У сиёсий даражада эришилган келишувларни энди амалиётга татбиқ этиш зарурлигини таъкидлади. «Вазифамиз — сиёсий ишончни қўшма ишлаб чиқариш ва инвестициялар орқали мустаҳкамлашдир», — деди Шавкат Мирзиёев.
Биринчи йўналиш сифатида Президент машинасозлик ва электротехника тармоғини алоҳида қайд этди.
Унинг сўзларига кўра, Ўзбекистон автомобиль саноати General Motors, Volkswagen, Kia ва BYD билан ҳамкорликда йилига 500 мингга яқин автомобиль ишлаб чиқармоқда, электротехника маҳсулотлари эса 70 дан ортиқ мамлакатга етказиб берилмоқда.
Ўзбекистон Сербия компанияларига автомобиль ва саноат бутловчи қисмлари, ускуналар ва трансформаторлар қўшма ишлаб чиқаришни ташкил этишни таклиф қилди.
Goša FOM — 1923 йилда ташкил этилган ва оғир саноат ускуналарини лойиҳалаш ҳамда ишлаб чиқаришга ихтисослашган йирик машинасозлик корхонасидир. Компания янги авлод кокс-кимё машиналари, оғир тоифадаги қувватли кўприкли ва козловий кранлар, ГЭСлар учун гидромеханик ускуналар, шунингдек, тоғ-кон саноати учун техникаларнинг халқаро етказиб берувчиси сифатида танилган. Лойиҳалаш ва металл конструкцияларни пайвандлашдан тортиб, юқори аниқликдаги редукторларни йиғишгача бўлган ёпиқ ишлаб чиқариш цикли туфайли завод маҳсулотлари бутун дунё бўйлаб, жумладан, МДҲ давлатларидаги энг йирик металлургия ва энергетика объектларига фаол экспорт қилинмоқда.
Иккинчи йўналиш фармацевтика саноати бўлди. Мирзиёев Ўзбекистон фармацевтика маҳсулотлари бозорини қарийб 3 млрд долларга баҳолади ва мамлакат нафақат дори-дармонларни импорт қилишдан, балки уларни ишлаб чиқаришни маҳаллийлаштиришдан ҳам манфаатдор эканини таъкидлади.
«Сизларни оддий савдодан технологиялар трансфери ва қўшма корхоналар ташкил этишга ўтишга таклиф этамиз», — деди Президент.
Истиқболли ҳамкорлар қаторида у Сербиянинг Galenika ва AbelaPharm компанияларини тилга олди.
Учинчи йўналиш сифатида Президент енгил саноатни тилга олди. Унинг сўзларига кўра, Ўзбекистонда пахта хомашёсидан тайёр маҳсулотгача бўлган тўлиқ ишлаб чиқариш занжири яратилган, тўқимачилик маҳсулотлари эса 75 та давлатга экспорт қилинмоқда.
Мирзиёев Сербиянинг Yumco ва Luss Textile компаниялари билан Ўзбекистонда ишлаб чиқаришни маҳаллийлаштириш бўйича музокаралар олиб борилаётганини маълум қилди.
Истиқболда қўшма корхоналар нафақат икки мамлакатнинг ички бозорларига, балки қўшилган қийматга эга маҳсулотларни учинчи давлатларга экспорт қилишга ҳам йўналтирилиши мумкин.
Яна бир истиқболли йўналиш сифатида қишлоқ хўжалиги ва озиқ-овқат саноати кўрсатилди.
Мирзиёев Ўзбекистоннинг гилос, шафтоли, олхўри ва ўрик экспортидаги мавқеини қайд этиб, селекция, уруғчилик ва агротехнологиялар соҳасида Сербия тажрибасига қизиқиш билдирди.
Унинг сўзларига кўра, Ўзбекистон Нови-Саддаги тегишли институт билан аллақачон келишувга эга.
«Бизда унумдор ер, сув етарли — қўшма агрокластерлар яратишга тайёрмиз», — деди давлат раҳбари.
Бешинчи йўналиш сифатида Мирзиёев рақамли иқтисодиётни тилга олди. Унинг сўзларига кўра, Ўзбекистоннинг IT-хизматлар экспорти сўнгги икки-уч йил ичида 1 млрд доллардан ошди.
Президент Сербия компанияларини 22−25 сентябрь кунлари Тошкентда бўлиб ўтадиган Халқаро АКТ ҳафталигига (ICT Week Uzbekistan 2026) таклиф этди. Унинг доирасида Сербия компаниялари учун алоҳида бизнес-форум ўтказиш режалаштирилган.
Аввалроқ Ўзбекистон ва Сербия стратегик шериклик муносабатлари ўрнатилганини эълон қилган эди. Томонлар, шунингдек, эркин савдо тўғрисидаги битимни тайёрлашни бошладилар ва саноат кооперациясини ривожлантиришга келишиб олдилар.
Бундан ташқари, Шавкат Мирзиёев тўлақонли элчихона ташкил этилишини кутмасдан, Белградда Ўзбекистоннинг алоҳида дипломатик ваколатхонасини очиш тўғрисида қарор қабул қилинганини маълум қилди. Биринчи дипломатларни Сербияга келгуси ҳафтадаёқ юбориш режалаштирилган.
Аввалроқ Тошкент ва Белград ўртасида тўғридан-тўғри авиақатновларни йўлга қўйиш режалари ҳақида ҳам хабар берилган эди. Сербия Президенти Александр Вучичнинг сўзларига кўра, мунтазам рейслар етти-саккиз ой ичида пайдо бўлиши мумкин.
Александр Вучич, шунингдек, мудофаа саноатида, жумладан, узоқ масофали баллистик ракеталар йўналишида Ўзбекистон билан ҳамкорлик қилишга тайёрлигини билдирди. Унинг сўзларига кўра, Сербия уларни ишлаб чиқаришни тахминан бир йилдан кейин бошлашни режалаштирмоқда ва ҳозирда қисқа масофали ракеталарни ишлаб чиқармоқда.
Бундан ташқари, Вучич Шавкат Мирзиёев билан энергетика масалалари бўйича суҳбатлашганини сўзлаб берди. Унинг сўзларига кўра, Ўзбекистон Президенти мамлакат битта атом электр станциясини Россия билан қураётганини, иккинчисини эса Хитой билан тайёрлаётганини маълум қилган.