Ўзбекистон Нахичеван темир йўли қурилишида иштирок этиш имкониятларини ўрганмоқда
Ўзбекистон Туркиянинг Самсун ва Истанбул портларига чиқиш имконини берувчи Нахичеван темир йўли қурилишида иштирок этиш имкониятини кўриб чиқмоқда. Аввалроқ Озарбайжон лойиҳани амалга ошириш учун халқаро консорциум тузишни таклиф қилган эди.
Ўзбекистон Туркиянинг Самсун ва Истанбул портларига чиқишни таъминлаши керак бўлган Нахичеван темир йўли қурилишида иштирок этиш имкониятини кўриб чиқмоқда. Бу ҳақда йирик транспорт-логистика лойиҳалари тақдимоти якунлари бўйича Президент матбуот хизмати маълум қилди.
Эслатиб ўтамиз, август ойида Озарбайжон Президенти Илҳом Алиев Нахичеван темир йўлини реконструкция қилиш учун халқаро консорциум тузилиши мумкинлигини айтган эди. Унга ушбу йўналиш бўйича инвестициялар, фойда ва кафолатланган ташиш ҳажмларидан манфаатдор бўлган компания ва мамлакатларни жалб этиш таклиф қилинган.
Денгиз портларига чиқиш имкониятларини кенгайтириш доирасида Ўзбекистон Каспий денгизидаги Оқтау, Туркманбоши ва Боку, шунингдек, Қора денгиздаги Поти ва Анаклия портларида логистика инфратузилмасини яратишда ҳам иштирок этмоқчи.
Президент матбуот хизмати маълумотларига кўра, Поти портида логистика марказини ташкил этиш тўғрисидаги битим аллақачон имзоланган бўлиб, ҳозирда лойиҳанинг техник-иқтисодий асослари ишлаб чиқилмоқда. Шу билан бирга, Ўзбекистоннинг Анаклия чуқур денгиз портини ривожлантиришдаги иштироки имкониятлари ўрганилмоқда.
Янги йўналишлар Ўзбекистоннинг тўқимачилик, кимё, қишлоқ хўжалиги ва тоғ-кон металлургия маҳсулотларини экспорт қилиш имкониятларини кенгайтириши кутилмоқда.