Ўзбекистон ҳудудларида камбағаллик ва ишсизликка қарши курашиш бўйича штаблар ташкил этилади
Ўзбекистон ҳудудларида камбағаллик ва ишсизликка қарши курашиш бўйича штаблар ташкил этилади
Ўзбекистонда камбағалликка қарши курашиш ёндашуви ўзгармоқда. Ҳудудларда махсус штаблар ташкил этилади, ҳокимлар эса иш ҳафтасининг деярли ярмини ушбу фаолиятга бағишлашига тўғри келади.
Янги тизим Шавкат Мирзиёев раислигида ўтган камбағалликни қисқартириш ва аҳоли даромадларини ошириш масалаларига бағишланган йиғилишда тақдим этилди.
Мамлакатнинг ҳар бир вилояти ва туманида ҳокимлар бошчилигида штаблар ташкил этилади. Вилоят, туман ва шаҳар раҳбарлари бутун иқтисодий комплекс билан биргаликда ҳафтада уч кун фақат камбағаллик ва бандлик масалалари билан шуғулланади. Банклар ва бандликка кўмаклашиш хизматлари штабларга жойлардаги муаммоларни ҳал қилишда ёрдам бериши керак бўлади.
Президент маҳаллалардаги банк ходимлари ва ҳоким ёрдамчилари фаолиятини алоҳида танқид қилди. Уларнинг аксарияти ҳали ҳам лойиҳаларни кўриб чиқишни гаров таъминоти бор-йўқлиги ҳақидаги саволдан бошлаши ҳамда лизинг, факторинг, кафолат ва суғурта каби воситаларни яхши тушунмаслиги таъкидланди.
Шунингдек, расмийлар кредитлар ажратишда бюрократия сақланиб қолаётганини, тўлов графикларида эса кўпинча муайян бизнеснинг ўзига хос хусусиятлари ҳисобга олинмаслигини тан олдилар. Оилавий ва ёшлар тадбиркорлиги дастурлари доирасидаги имтиёзли кредитларни бошқаришни туман штабларига ўтказишга қарор қилинди.
Йиғилишда Хоразмдаги кам таъминланган оилаларни ўрганиш натижалари ҳам маълум қилинди. Уларда 48 минг нафар бола истиқомат қилади, бироқ уларни эрта касб-ҳунарга ўргатиш бўйича махсус дастур ҳозирча мавжуд эмас. Бундай оилалардаги 10 мингдан ортиқ аёл бола парвариши билан банд, шу билан бирга, уларнинг фарзандларини мактабгача таълим билан қамраб олиш даражаси 75 фоизга ҳам етмайди. Мутасаддиларга эҳтиёжманд оилалар фарзандлари учун қўшимча тўгараклар ташкил этиш ва касб-ҳунарга тайёрлаш имкониятларини кенгайтириш топширилди.
Шавкат Мирзиёев Хоразм вилоятида касб-ҳунарга ўқитиш тизимини қайта кўриб чиқиш ва мутахассислар тайёрлашни меҳнат бозорининг реал эҳтиёжлари билан боғлаш бўйича топшириқ берди. Йил бошидан буён у ерда 29 минг киши ишга жойлаштирилди.