Ўзбекистон ҳудудидаги Буюк ипак йўли чорраҳасида янги манзил очилмоқда
Навоий вилоятининг Кармана туманида туризм, экология, қишлоқ хўжалиги ва замонавий кўнгилочар хизматларни бирлаштирувчи “Малик Карвон Фамилй Парк” мажмуаси барпо этилди.
Ўзбекистоннинг Буюк Ипак йўли чорраҳасида янги сайёҳлик маскани очилмоқда.
Қадимдан Буюк Ипак йўлининг муҳим нуқталаридан бири бўлган Навоий вилоятида янги туристик мажмуанинг ташкил этилиши ҳудуднинг сайёҳлик салоҳиятини янада ошириши кутилмоқда.
Қиймати 8 миллион АҚШ долларига тенг бўлган ушбу лойиҳа 4 гектар майдонни эгаллайди. Мажмуа таркибида тропик ва субтропик боғ, экзотик ўсимликлар, турли-туман гуллар, фавворалар ва сув ҳавзалари, болалар майдончалари, замонавий аттраксионлар, ресторан ҳамда оилавий дам олиш зоналари барпо этилган. Шунингдек, инновацион ва сунъий интеллект технологияларидан фойдаланиш режалаштирилган.
Лойиҳа доирасидаги асосий йўналишлардан бири агротуризм бўлади. Мажмуа ҳудудидаги замонавий иссиқхоналарда қулупнай, голубика, помидор ва бодринг етиштирилади. Меҳмонлар иссиқхоналардаги жараёнлар билан танишиш, шунингдек, чорвачилик йўналиши орқали қишлоқ хўжалиги билан яқиндан танишиш имкониятига эга бўлишади.
Мажмуа М37 халқаро автомобил йўли бўйида жойлашган бўлиб, бу йўналишда кунига қарийб 40 мингта автомобил ҳаракатланади. Бу эса масканни нафақат Навоий аҳолиси, балки бошқа ҳудудлардан келувчи меҳмонлар, автотуристлар ва хорижий сайёҳлар учун ҳам қулай дам олиш масканига айлантиради.
“Малик Карвон Фамилй Парк” деб номланган ушбу мажмуанинг сентабр ойида ишга туширилиши режалаштирилган. Лойиҳа доирасида 150 та янги иш ўрни яратилади.
Янги мажмуа Буюк Ипак йўли бўйидаги тарихий ҳудуднинг туристик имкониятларини замонавий дам олиш, агротуризм ва кўнгилочар хизматлар билан уйғунлаштирадиган масканлардан бирига айланиши кутилмоқда.