Ўзбекистон Ҳиндистонга ЖСТга аъзо бўлишни қўллаб-қувватлагани учун миннатдорчилик билдирди
Қўшма баёнотда Шавкат Мирзиёев ва Нарендра Моди ЖСТга асосланган кўп томонлама савдо тизимини сақлаб қолиш ва имтиёзли савдо шартномаси учун техник-иқтисодий асослашни ўтказиш бўйича ҳамкорлик қилишга келишиб олдилар.
Ўзбекистон Ҳиндистонга Жаҳон савдо ташкилотига аъзо бўлишда кўрсатган ёрдами учун миннатдорчилик билдирди. Ушбу маълумот Ҳиндистон Бош вазири Нарендра Модининг 2026-йил 29-30-август кунлари Ўзбекистонга давлат ташрифи якунлари бўйича эълон қилинган қўшма баёнотда келтирилган.
Ҳужжатга кўра, Ўзбекистон Президенти Шавкат Мирзиёев ва Ҳиндистон Бош вазири Нарендра Моди ЖСТ марказида бўлган, ривожланаётган мамлакатлар манфаатларига алоҳида эътибор қаратган кўп томонлама савдо тизимини қўллаб-қувватлаш ва ҳимоя қилиш учун биргаликда ишлашга келишиб олдилар. Шунингдек, раҳбарлар ишлаб чиқариш ва экспорт салоҳиятини мустаҳкамлаш, тартибга солувчи органлар ўртасидаги мулоқотни рағбатлантириш ва иккала мамлакатда бозорга киришни осонлаштириш ва тезлаштириш учун ўзаро тан олиш шартномаларини тузиш имкониятларини ўрганишга қаратилган ташаббусларни қўллаб-қувватлашга тайёр эканликларини билдиришди.
Баёнотда Мирзиёев ва Моди ўзаро савдо ҳажмининг барқарор ўсишини мамнуният билан қайд этганликлари ва мустаҳкам савдо алоқаларини ўрнатиш учун савдо алоқаларини кенгайтириш ва диверсификация қилишни давом эттириш ниятларини тасдиқлаганликлари таъкидланган. Ўзбекистон ва Ҳиндистон ўртасидаги имтиёзли савдо шартномаси бўйича қўшма техник-иқтисодий асослаш ишлари якунланганига ишора қилиб, раҳбарлар тегишли идораларга белгиланган муддат ичида ушбу йўналишда кейинги қадамларни ишлаб чиқишни топширдилар.