Ўзбекистон армияси қўшниларига қараганда қанчалик кучли?

Ўзбекистон армияси қўшниларига қараганда қанчалик кучли?

Ўзбекистон 2026 йилги жаҳон ҳарбий қудрат рейтингида 146 та мамлакат орасида 53-ўринни эгаллади. Марказий Осиё давлатлари орасида республика энг яхши натижани кўрсатиб, Қозоғистон, Туркманистон, Тожикистон ва Қирғизистонни ортда қолдирди.

Эълон қилинган Global Firepower рейтингига кўра, етакчи учликка АҚШ, Россия ва Хитой кирди. Франция, Япония, Буюк Британия, Туркия ва Италия ҳам кучли ўнликдан жой олди.

Ўзбекистон 0,9908 ҳарбий қудрат индекси билан 53-поғонада жойлашди ва Марказий Осиёда биринчи бўлди. Минтақанинг қолган мамлакатлари қуйидаги ўринларни эгаллади:

Қозоғистон — 58-ўрин, индекс 1,0433.

Туркманистон — 78-ўрин, индекс 1,7459.

Тожикистон — 100-ўрин, индекс 2,1749.

Қирғизистон — 109-ўрин, индекс 2,3969.

Бошқа собиқ совет давлатлари орасида юқори позицияни Россия эгаллаб турибди — дунёда иккинчи ўрин. Кейинги ўринлар қуйидагича тақсимланди:

Украина — 20-ўрин, индекс 0,3691.

Озарбайжон — 60-ўрин, индекс 1,1991.

Беларусь — 70-ўрин, индекс 1,4072.

Грузия — 95-ўрин, индекс 2,0779.

Арманистон — 101-ўрин, индекс 2,2016.

Молдова — 136-ўрин, индекс 3,6225.

Рейтинг эҳтимолий ҳарбий низо оқибатининг тўғридан-тўғри прогнози ҳисобланмайди. У танланган методика бўйича давлатларнинг ҳарбий имкониятларини солиштиришга имкон беради, аммо ўз-ўзидан ҳақиқий жанговар ҳаракатлар боришига таъсир қилиши мумкин бўлган барча омилларни акс эттирмайди.

Бундан ташқари, Ўзбекистон Қуролли Кучлари сунъий интеллект технологияларини кенг кўламда жорий этишга ва рақамли сарҳадлар ҳимоясини кучайтиришга киришаётгани хабар қилинмоқда. Шавкат Мирзиёев Мудофаа вазирлиги марказий аппаратида Сунъий интеллект технологиялари департаменти ҳамда ихтисослаштирилган киберхавфсизлик лабораториясини ташкил этишни маъқуллади.